അണിയറയില് ഒരുങ്ങുന്ന മമ്മൂട്ടി ചിത്രം ‘ദി പ്രീസ്റ്റി’ന്റെ സംവിധായകന് ജോഫിന് ടി ചാക്കോ വിവാഹിതനായി. ആന്സിയാണ് വധു. പ്രൊഡക്ഷന് കണ്ട്രോളര് ബാദുഷയാണ് ജോഫിന്റെയും ആന്സിയുടെ വിവാഹ ചിത്രം ഫേസ്ബുക്കില് പങ്കുവെച്ചത്. നവദമ്പതികള്ക്ക് ആശംസകള് നേര്ന്നുകൊണ്ടാണ് ബാദുഷയുടെ പോസ്റ്റ്.
മമ്മൂട്ടിയ്ക്ക് ഒപ്പം മഞ്ജു വാര്യര് ആദ്യമായി കൈകോര്ക്കുന്ന ചിത്രം കൂടിയാണ് ‘ദി പ്രീസ്റ്റ്’. ജോഫിന്റെ ആദ്യ സംവിധാനസംരംഭമാണ് ‘ദി പ്രീസ്റ്റ്’. മമ്മൂട്ടി വൈദികനായി എത്തുന്ന ചിത്രത്തിന്റെ ഫസ്റ്റ്ലുക്ക് പോസ്റ്റര് മുന്പ് സോഷ്യല് മീഡിയയില് തരംഗമായി മാറിയിരുന്നു. സംവിധായകന് ജിസ് ജോയിയുടെ അസിസ്റ്റന്റായി പ്രവര്ത്തിച്ചിട്ടുള്ള ആളാണ് ജോഫിന്. ബി.ഉണ്ണിക്കൃഷ്ണന്, ആന്റോ ജോസഫ് എന്നിവര് ചേര്ന്നാണ് ചിത്രം നിര്മ്മിക്കുന്നത്.
ജോഫിന്റെ കഥയ്ക്ക് തിരക്കഥ ഒരുക്കിയിരിക്കുന്നത് ‘കുഞ്ഞിരാമായണം’ എന്ന സിനിമയ്ക്ക് തിരക്കഥ ഒരുക്കിയ ദീപു പ്രദീപ്, ‘കോക്ക്ടെയില്’ എന്ന ജയസൂര്യ ചിത്രത്തിന് തിരക്കഥ ഒരുക്കിയ ശ്യം മേനോന് എന്നിവര് ചേര്ന്നാണ്. ചിത്രത്തിന്റെ സംഗീതവും പശ്ചാത്തലസംഗീതവും രാഹുല് രാജ് നിര്വ്വഹിക്കും.
