വാഷിംഗ്ടണ്‍ ഡിസി: റാപ്പര്‍ കാന്യെ വെസ്റ്റിന് അമേരിക്കന്‍് പ്രസിഡന്‍റ് തെരഞ്ഞെടുപ്പില്‍ സ്ഥാനാര്‍ഥിത്വത്തിന് യോഗ്യത. ചൊവ്വാഴ്ചയാണ് സ്റ്റേറ്റ് ബോര്‍ഡ് ഓഫ് ഇലക്ഷന്‍ കമ്മീഷണേഴ്സ് വെസ്റ്റിന്‍റെ സ്ഥാനാര്‍ഥിത്വത്തിന് അംഗീകാരം നല്‍കിയത്. ഇതോടെ മിസിസിപ്പിയില്‍ ബാലറ്റില്‍ പ്രസിഡന്‍റ് സ്ഥാനാര്‍ഥിയായി കാന്യെയുടെ പേരുമുണ്ടാകും.
അര്‍ക്കന്‍സാസ്, ഐഡഹോ, അയോവ, ടെന്നസി, ഒക് ലഹോമ, യൂട്ട എന്നിവയുള്‍പ്പെടെ സംസ്ഥാനങ്ങളില്‍ സ്വതന്ത്ര സ്ഥാനാര്‍ഥിയായി ബാലറ്റില്‍ പ്രത്യക്ഷപെടാന്‍ കാന്യെ ഇതിനകം യോഗ്യത നേടിയിട്ടുണ്ട്. മിസിസിപ്പിയില്‍ യോഗ്യത നേടുന്നതിനായി സ്റ്റേറ്റ് സെക്രട്ടറിയുടെ ഓഫിസിലേക്ക് 2500 ഡോളര്‍ ഫീസ് അടയ്ക്കുകയും കുറഞ്ഞത് 1000 മിസിസിപ്പി വോട്ടര്‍മാരുടെ ഒപ്പ് നേടുകയുമായിരുന്നു വേണ്ടത്.
ഒരുകാലത്ത് പ്രസിഡന്‍റ് ഡോണള്‍ഡ് ട്രംപിനെ പിന്തുണച്ചിരുന്ന കാന്യെ ആ ബന്ധം അവസാനിപ്പിച്ചതായും തെരഞ്ഞെടുപ്പില്‍ സ്വതന്ത്രനായി മത്സരിക്കുമെന്നും രണ്ടുമാസം മുന്പാണ് പ്രഖ്യാപിച്ചത്. മൂന്ന് കോടിയോളം ആളുകള്‍ പിന്തുടരുന്ന തന്‍റെ ട്വിറ്റര്‍ പേജിലായിരുന്നു സ്ഥാനാര്‍ഥിത്വം പ്രഖ്യാപിച്ചത്.
