ഇന്ത്യയിലാകെ പൊതുവില് നടപ്പിലാക്കി വരുന്ന വികസനത്തിന്റെ ഭാഗമാകാന് ഭരണഘടനാ അനുച്ഛേദം 370 റദ്ദാക്കിയതിലൂടെ കശ്മീർ ജനതയ്ക്ക് ലഭ്യമായത് വലിയ വികസന നേട്ടങ്ങളാണ്. സ്വാതന്ത്ര്യം കിട്ടി 70 വര്ഷം കഴിഞ്ഞിട്ടും കശ്മീർ ഇന്ത്യയുടെ പൊതുധാരയില് ഉണ്ടായിരുന്നില്ല. അതുകൊണ്ട് തന്നെ മുഖ്യധാരയുമായി ബന്ധപ്പെട്ട് പ്രവര്ത്തിക്കാന് കശ്മീര് ജനതയ്ക്ക് കഴിഞ്ഞില്ല. സാമൂഹിക തുല്യത കൈവരിക്കാന് ആവശ്യമായ സംവരണം ഉള്പ്പെടെയുള്ള കാര്യങ്ങളില് കശ്മീര് പിന്നാക്കം പോകുകയും ചെയ്തു. സാമൂഹിക, സാംസ്കാരിക, സാമ്പത്തിക മേഖലകളില് ഇന്ത്യയുമായി സമന്വയിക്കാന് ഈ നിയമനിര്മ്മാണത്തിലൂടെ കശ്മീരിന് കഴിഞ്ഞു. രാഷ്ട്രീയം മാറ്റിവച്ചാല് അനുച്ഛേദം 370 റദ്ദാക്കിയത് മൂലം വികസന രംഗത്ത് ഉണ്ടായ മാറ്റങ്ങള് അനവധിയാണ്.
റോഡ്, റെയിൽ, വൈദ്യുതി, ആരോഗ്യം, ടൂറിസം, കൃഷി, ഹോർട്ടികൾച്ചർ, നൈപുണ്യ വികസനം തുടങ്ങിയവയില് വലിയ മാറ്റം കാണാം.
റോഡ് വികസനത്തില് വലിയ മുന്നേറ്റം ഇക്കഴിഞ്ഞ മൂന്ന് വര്ഷത്തിനിടെ ജമ്മുകശ്മീരിലുണ്ടായി. ജമ്മു ബൈപാസ്, ജമ്മു-ഉധംപൂർ സെക്ഷൻ, ചനിനി – നാശാരി തുരങ്കം, ലഖൻപൂർ-ഹിരാനഗർ, ഹിരാനഗർ-വിജയ്പൂർ എന്നിവയുടെ നിർമ്മാണം പൂർത്തിയായി. ഉദംപൂർ-റമ്പാൻ, റമ്പാൻ-ബനിഹാൽ, ബനിഹാൽ-ശ്രീനഗർ, കാസിഗണ്ട്-ബനിഹാൽ തുരങ്കപാത പദ്ധതിക്ക് ചുറ്റുമുള്ള റിംഗ് റോഡ് അതിവേഗത്തിലാണ് പുരോഗമിക്കുന്നത്. പദ്ധതിയുടെ ആകെ ചിലവ് 8000 കോടി രൂപയാണ്. 21,653 കോടി രൂപ മുതല്മുടക്കുള്ള ഉദംപൂർ-ശ്രീനഗർ-ബാരാമുള്ള റെയിൽ ലിങ്ക് 2023 ഓടെ പൂർത്തീകരിക്കും വിധമാണ് പ്രവര്ത്തനം.
2022 ഡിസംബറോടെ കശ്മീരിലെ സ്ഥലങ്ങൾ ട്രെയിൻ വഴി ബന്ധിപ്പിക്കും. ഉദ്മാപൂർ-കത്ര (25 കിലോമീറ്റർ) ഭാഗം, ബനിഹാൽ-ക്വാസിഗണ്ട് (18 കിലോമീറ്റർ) ഭാഗം, ക്വാസിഗണ്ട്-ബാരാമുള്ള (118 കിലോമീറ്റർ) ഭാഗം എന്നിവ ഇതിനകം കമ്മീഷൻ ചെയ്തു. കൂടാതെ മെട്രോ റെയിൽ ശ്രീനഗറിലേക്കും ജമ്മുവിലേക്കുമുള്ള പാതയിലാണ്.
ജമ്മു കശ്മീരിലെ ആരോഗ്യ പരിരക്ഷാ രംഗത്തും ഇക്കാലയളവില് വലിയ മാറ്റങ്ങള് കാണാം. എയിംസ് പദ്ധതികൾ അതിവേഗം പുരോഗമിക്കുകയാണ്, 2023ഓടെ ജമ്മുവിലും, 2025ഓടെ മറ്റൊന്ന് കശ്മീരിലും പൂർത്തീകരിക്കും. ആരോഗ്യമേഖലയില് കോർപ്പറേറ്റുകളായ അപ്പോളോ, മേദാന്ത, ഹിന്ദുജാസ് തുടങ്ങിയവരും നിക്ഷേപം നടത്താൻ സന്നദ്ധത പ്രകടിപ്പിച്ചിട്ടുണ്ട്. ആർട്ടിക്കിൾ 370 റദ്ദാക്കുന്നതിന് മുമ്പ് ആരോഗ്യമേഖലയില് നീക്കിവച്ചത് 350 കോടി രൂപയായിരുന്നെങ്കില് ഈ വർഷം അത് 1268 കോടി രൂപ അനുവദിച്ചിട്ടുണ്ട്. ജമ്മു, ശ്രീനഗർ എന്നിവിടങ്ങളിൽ ഡിആർഡിഒ വികസിപ്പിച്ച 500 കിടക്കകളുള്ള രണ്ട് കോവിഡ് ആശുപത്രികൾ രോഗപ്രതിരോധ രംഗത്ത് സജീവമാണ്. കോവിഡ് -19 മൂന്നാം തരംഗ സാധ്യത മുന്നിർത്തി ജമ്മു കശ്മീരിലെ വിദൂര പ്രദേശങ്ങളിൽ 30 പുതിയ ഓക്സിജൻ പ്ലാന്റുകൾ സ്ഥാപിച്ചു വരുന്നു.
എയിംസ്, ഐഐടി, ഐഐഎം തുടങ്ങിയ പ്രീമിയർ വിദ്യാഭ്യാസ സ്ഥാപനങ്ങൾ ആരംഭിച്ചതോടെ, ഈ മൂന്ന് ലോകോത്തര സ്ഥാപനങ്ങളും ഒരുമിച്ചുള്ള രാജ്യത്തെ ഏക സംസ്ഥാനമായി ജമ്മു കശ്മീര്. കഴിഞ്ഞ മൂന്ന് വർഷത്തിനിടെ ഏഴ് പുതിയ മെഡിക്കൽ കോളേജുകൾ ആരംഭിച്ചു. അതിൽ നാലെണ്ണം ഇതിനകം തന്നെ പ്രവർത്തിക്കുന്നു.
മെഡിക്കൽ കോളേജുകളിൽ സീറ്റുകൾ 500 ൽ നിന്ന് 955 ആയും 50 പുതിയ കോളേജുകളിലെ റെഗുലർ ഡിഗ്രി കോളേജുകളിൽ 25000 സീറ്റുകളായും ഉയർത്തി. കൂടാതെ കത്വയിലും ഹാൻഡ്വാരയിലും ബയോടെക്നോളജിക്കായി രണ്ട് ഐടി പാർക്കുകൾ സ്ഥാപിച്ചിട്ടുണ്ട്.
പുതിയ വ്യവസായ നയം പ്രകാരം പുറംനാട്ടുകാര്ക്ക് ഭൂമി 90 വര്ഷത്തേക്ക് പാട്ടത്തിനെടുക്കാൻ കഴിയും. കഴിഞ്ഞ ഒന്നര വർഷത്തിനിടയിൽ സ്വീകരിച്ച പ്രധാന നടപടികളിലൊന്നാണ്. 40 ലധികം കമ്പനികൾ ജമ്മു കശ്മീരിൽ നിക്ഷേപം നടത്താൻ താൽപര്യം പ്രകടിപ്പിച്ചതായി കണക്കുകൾ വ്യക്തമാക്കുന്നു. നിക്ഷേപ സാധ്യത ഏകദേശം 15000 കോടി രൂപയാണ്. റിന്യൂവൽ എനർജി, ഹോസ്പിറ്റാലിറ്റി, പ്രതിരോധം, ടൂറിസം, നൈപുണ്യം, വിദ്യാഭ്യാസം, ഐടി, ടെക്നോളജി, ഇൻഫ്രാസ്ട്രക്ചർ തുടങ്ങി വിവിധ മേഖലകളിൽ നിന്നുള്ള കമ്പനികൾ തങ്ങളുടെ യൂണിറ്റുകൾ ജമ്മു കശ്മീരിൽ സ്ഥാപിക്കാൻ മുന്നോട്ട് വന്നിട്ടുണ്ട്.
വികസനത്തിന്റെയും സാമ്പത്തിക വിഭവങ്ങളുടെയും കാര്യത്തിൽ 13,600 കോടി രൂപയുടെ 168 ധാരണാപത്രങ്ങൾ നിക്ഷേപത്തിനായി ഒപ്പുവെച്ചു. ജമ്മു കശ്മീരിൽ വ്യവസായങ്ങൾ ആരംഭിക്കുന്നതിന് 6,000 ഏക്കർ സർക്കാർ ഭൂമി ഏറ്റെടുത്തിട്ടുണ്ട്. ജമ്മു കശ്മീർ ഇൻഫ്രാസ്ട്രക്ചർ ഡെവലപ്മെന്റ് ഫിനാൻസ് കോർപ്പറേഷനും വിവിധ പദ്ധതികൾ പൂർത്തീകരിക്കുന്നതിനായി രൂപീകരിച്ചു.
തൊഴിലവസരങ്ങളുടെ കാര്യത്തില് സർക്കാർ കണക്കനുസരിച്ച് 2019-20 ൽ അധ്യാപകർക്കായി 27000 പുതിയ തസ്തികകളും 2020-21ൽ 50000 പുതിയ തസ്തികയും 2000 കോടി രൂപയും അനുവദിച്ചു. ഗ്രാമതലത്തിൽ ശാക്തീകരണ സംവിധാനം ഉറപ്പാക്കുന്നതിന് ഗ്രാമപഞ്ചായത്ത് തലങ്ങളിൽ 2000 അക്കൗണ്ടന്റുമാരെ നിയമിച്ചു. ജമ്മു കശ്മീർ സർക്കാരിന്റെ ഒരു അപൂർവ റിക്രൂട്ട്മെന്റ് ഡ്രൈവിലൂടെ 10,000 ഒഴിവുകൾ നികത്താന് തീരുമാനമായി. 25000 ഒഴിവുകള് കൂടി പിന്നീട് നികത്തും. ജൂനിയർ തസ്തികകളായ ഡോക്ടർമാർ, മൃഗഡോക്ടർമാർ, പഞ്ചായത്ത് അക്കൗണ്ട് അസിസ്റ്റന്റുമാരുടെ തസ്തികകൾ ഇതിൽ ഉൾപ്പെടുന്നു.
ഊര്ജ്ജോത്പാദന മേഖലയിലും കാതലായ മാറ്റങ്ങള് ജമ്മുകശ്മീരില് കാണാം. കഴിഞ്ഞ ആറ് വർഷമായി മുടങ്ങിക്കിടന്ന ജമ്മു കശ്മീരിലെ 850മെഗാവാട്ട് റാറ്റിൽ ജലവൈദ്യുത (5282 കോടി രൂപ) പ്രവൃത്തി പുനരുജ്ജീവിപ്പിച്ചു. കിഷ്ത്വാർ ജില്ലയിലെ ചെനാബ് നദിയിൽ സ്ഥിതിചെയ്യുന്ന പദ്ധതിയാണ് ഇത്.
