ന്യൂഡല്‍ഹി: ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍ കോവിഡ് പോസിറ്റീവായതിന് തൊട്ടുപിറകെ ഗതാഗത മന്ത്രി മൂല്‍ ചന്ദ് ശര്‍മക്കും വൈറസ് ബാധ സ്ഥിരീകരിച്ചു. പരിശോധനയില്‍ താന്‍ കോവിഡ് പോസിറ്റീവെന്ന് കണ്ടെത്തിയതായും കഴിഞ്ഞ കുറച്ചു ദിവസങ്ങളായി താനുമായി സമ്ബര്‍ക്കത്തില്‍ വന്നവര്‍ പരിശോധനക്ക് തയാറാകണമെന്നും മന്ത്രി മൂല്‍ ചന്ദ് ശര്‍മ അറിയിച്ചു.
കേന്ദ്ര ജലശക്തി മന്ത്രി ഗജേന്ദ്ര സിങ് ഷെഖാവത്തുമായുള്ള കൂടിക്കാഴ്ചയില്‍ പങ്കെടുത്ത് ശേഷമാണ് ഹരിയാന മുഖ്യമന്ത്രി മനോഹര്‍ ലാല്‍ ഖട്ടറിനും കോവിഡ് സ്ഥിരീകരിച്ചത്. ന്യൂഡല്‍ഹിയിലെ സത്‌ലജ് യമുന ലിങ്ക് കനാല്‍ പ്രശ്‌നത്തില്‍ ഷെഖാവത്തുമായുള്ള നടത്തിയ കൂടിക്കാഴ്ചയില്‍ പങ്കെടുത്ത് രണ്ട് ദിവസത്തിന് ശേഷമാണ് ഖട്ടര്‍ പരിശോധനക്ക് വിധേയനായത്. കേന്ദ്രമന്ത്രി ഷെഖാവത്ത് കോവിഡ് പോസിറ്റീവായതിനെ തുടര്‍ന്നാണ് ഖട്ടര്‍ വീണ്ടും പരിശോധനക്ക് വിധേയനായത്. തുടര്‍ന്ന് അദ്ദേഹം ഔദ്യോഗിക വസതിയില്‍ ക്വാറന്‍റീനില്‍ പ്രവേശിച്ചിരുന്നു.
