തിരുവനന്തപുരം: കേന്ദ്രാവിഷ്‌കൃത പദ്ധതിയായ സമഗ്ര ശിക്ഷാ കേരളയുടെ 840.98 കോടി രൂപയുടെ വാര്‍ഷിക വിദ്യാഭ്യാസപ്രവര്‍ത്തനങ്ങള്‍ക്ക് പൊതു വിദ്യാഭ്യാസവകുപ്പ് മന്ത്രി പ്രൊഫ: സി രവീന്ദ്രനാഥിന്റെ അധ്യക്ഷതയില്‍ ചേര്‍ന്ന ഗവേണിംഗ് കൗണ്‍സില്‍ അംഗീകാരം നല്‍കി. 2020-21 അധ്യായന വര്‍ഷത്തേക്കുളള വിദ്യാഭ്യാസ പ്രവര്‍ത്തനങ്ങള്‍ക്കുവേണ്ടി സമഗ്ര ശിക്ഷാ കേരളം കേന്ദ്രസര്‍ക്കാരിനു സമര്‍പ്പിച്ച 1334.19 കോടി രൂപയുടെ പദ്ധതിയില്‍ 718.78 കോടി രൂപയുടെ പദ്ധതികള്‍ക്കാണ് അംഗീകാരം ലഭിച്ചിരുന്നത്.

സംസ്ഥാനത്തെ പൊതുവിദ്യാലയങ്ങളില്‍ കലാകായിക പ്രവൃത്തിപരിചയ മേഖലയില്‍ 2685 അധ്യാപകരെ 2020-21 അധ്യയന വര്‍ഷത്തില്‍ കരാര്‍ അടിസ്ഥാനത്തില്‍ നിയമിക്കുന്നതിന് പദ്ധതിയില്‍ വ്യവസ്ഥയുണ്ട്. അതിന്റെ ഭാഗമായി അധ്യാപകരെ സമഗ്ര ശിക്ഷാകേരളയില്‍ നിയമിച്ചിട്ടുണ്ട്. ഇവര്‍ക്കുളള മാസ ശമ്ബളയിനത്തില്‍ കേന്ദ്രസര്‍ക്കാര്‍ വിഹിതമായ 4,200/- രൂപയ്ക്ക് പുറമേ സംസ്ഥാന സര്‍ക്കാര്‍ നിശ്ചിയിച്ച്‌ നല്‍കുന്ന 9,800/- രൂപ കൂടി നല്‍കി ആകെ 14,000/- രൂപയായി തുടര്‍ന്നും നല്‍കും.

പ്രീ-പ്രൈമറി മുതല്‍ ഹയര്‍ സെക്കണ്ടറി വരെയുളള അക്കാദമിക പ്രവര്‍ത്തനങ്ങളും, അടിസ്ഥാന സൗകര്യവികസനം, ടീച്ചര്‍ എജ്യൂക്കേഷന്‍, ഡയറ്റുകളുടെ പ്രവര്‍ത്തനം തുടങ്ങിയ മേഖലകളിലെ പദ്ധതികള്‍ക്കുവേണ്ടിയാണ് തുക അംഗീകരിച്ചിരിക്കുന്നത്. ഭിന്നശേഷി കുട്ടികളുടെ വിദ്യാഭ്യാസ പ്രവര്‍ത്തനങ്ങള്‍ക്കായി ബന്ധപ്പെട്ട് പ്രവര്‍ത്തിക്കുന്ന റിസോഴ്‌സ് അധ്യാപകരെ കേന്ദ്രസര്‍ക്കാര്‍ അംഗീകരിച്ച ‘സ്‌പെഷ്യല്‍ എജ്യൂക്കേറ്റര്‍’ എന്ന് പുനര്‍നാമകരണം ചെയ്തതും അംഗീകരിച്ചു.

പൊതുവിദ്യാലയങ്ങളുടെ ഗുണനിലവാരം വര്‍ദ്ധിപ്പിക്കുന്നതിനുളള പദ്ധതി, ഭിന്നശേഷി വിദ്യാര്‍ത്ഥികള്‍ക്കളുടെ പ്രത്യേക പരിഗണനാ മേഖലകള്‍ക്കുളള തുക, തൊഴിലധിഷ്ഠിത വിദ്യാഭ്യാസം, സ്‌പോര്‍ട്‌സ് & ഫിസിക്കല്‍ എഡ്യൂക്കേഷന്‍ പദ്ധതികള്‍ തുടങ്ങി പൊതുവിദ്യാഭ്യാസ രംഗത്ത് ഗുണപരമായ മാറ്റങ്ങള്‍ നടപ്പിലാക്കുന്നതിന് കൊവിഡ്-19 പശ്ചാത്തലത്തിലൂന്നിയ നവീനമായ പദ്ധതി പ്രവര്‍ത്തനങ്ങള്‍ക്കാണ് സമഗ്ര ശിക്ഷാ കേരളയുടെ ഗവേണിംഗ് കൗണ്‍സിലില്‍ തീരുമാനങ്ങളുണ്ടായത്.

പൊതുവിദ്യാഭ്യാസ വകുപ്പുമന്ത്രി പ്രൊഫ: സി. രവീന്ദ്രനാഥ്, സെക്രട്ടറി എ.ഷാജഹാന്‍, ഡയറക്ടര്‍ ജീവന്‍ബാബു കെ., സമഗ്ര ശിക്ഷാ കേരള ഡയറക്ടര്‍ ഡോ. എ.പി.കുട്ടികകൃഷ്ണന്‍, എസ്.സി.ഇ.ആര്‍.ടി ഡയറക്ടര്‍ ഡോ. ജെ. പ്രസാദ്, എസ്.ഐ.ഇ.ടി ഡയറക്ടര്‍ അബുരാജ്, കണ്ണൂര്‍ ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, കെ.എസ്.ടി.എ ജനറല്‍ സെക്രട്ടറി കെ. സി. ഹരി കൃഷ്ണന്‍, എ.കെ.എസ്.ടി.യു ജനറല്‍ സെക്രട്ടറി ഒ.കെ. ജയകൃഷ്ണന്‍, കെ.പി.എസ്.ടി.എ ജനറല്‍ സെക്രട്ടറി എം. സലാഹുദ്ദീന്‍, വെള്ളിനേഴി ഗ്രാമപഞ്ചായത്ത് പ്രസിഡന്റ് കെ.ശ്രീധരന്‍, ധനവകുപ്പ് അണ്ടര്‍ സെക്രട്ടറി ബി.ഷഫീന, വിദ്യാഭ്യാസ വിചക്ഷണന്‍ കെ. പ്രഭാകരന്‍, വിദ്യാഭ്യാസ വിചക്ഷണന്‍ കെ രാമകൃഷ്ണന്‍ തുടങ്ങിയ സമിതി അംഗങ്ങള്‍ വീഡിയോ കോണ്‍ഫറന്‍സില്‍ പങ്കെടുത്തു.