വാഷിങ്ടണ്‍: കോവിഡ്-19 മൂലം യു.എസ്-ചൈന ബന്ധം ഉലയുന്നു. ചൈനീസ് പ്രസിഡന്‍റ് ഷി ജിന്‍പിങുമായി സംസാരിക്കാന്‍ തയാറല്ലെന്നും അവരുമായുള്ള ബന്ധം റദ്ദാക്കുന്ന നടപടികള്‍ ഉള്‍പ്പെടെ പരിഗണനയിലാണെന്നും യു.എസ് പ്രസിഡന്‍റ് ഡോണള്‍ഡ് ട്രംപ് വ്യക്തമാക്കി. ഫോക്സ് ബിസിനസ് നെറ്റ്വര്‍ക്കിനു നല്‍കിയ അഭിമുഖത്തില്‍ സംസാരിക്കുകയായിരുന്നു ട്രംപ്.
വൈറസിെന്‍റ വ്യാപനം തടയാതിരിക്കാന്‍ ചൈന നടപടി സ്വീകരിക്കാത്തതില്‍ അതീവ ദു:ഖമുണ്ട്. ജനുവരിയില്‍ ചൈനയുമായുള്ള വ്യാപാരബന്ധം പുനരാരംഭിക്കാന്‍ കരാര്‍ ഒപ്പുവെച്ചിരുന്നു. എന്നാല്‍ കരാറിനെ കുറിച്ച്‌ പുനരാലോചിക്കാന്‍ ഒരുതരത്തിലും തയാറല്ല. അവര്‍ക്ക് വൈറസിനെ ഫലപ്രദമായി തടയാമായിരുന്നു. എങ്കില്‍ വളരെ മികച്ച വ്യാപാരകരാര്‍ അവരെ കാത്തിരുന്നേനെ.
ചൈനീസ് പ്രസിഡന്‍റുമായി നല്ല ബന്ധമൊക്കെയാണ്. എന്നാല്‍ ഈയവസരത്തില്‍ അദ്ദേഹവുമായി സംസാരിക്കാന്‍ ഞാന്‍ ആഗ്രഹിക്കുന്നില്ല. അവരുമായി ഒരുതരത്തിലുള്ള ബന്ധവും മുന്നോട്ടുകൊണ്ടുപോകാന്‍ ആഗ്രഹിക്കുന്നില്ലെന്ന് ചൈനീസ് വിദ്യാര്‍ഥികള്‍ക്ക് യു.എസില്‍ ഉപരിപഠനത്തിനുള്ള അവസരം നിഷേധിക്കുമോ എന്ന ചോദ്യത്തിന് മറുപടിയായി അദ്ദേഹം പറഞ്ഞു.
അതിനിടെ ചൈനയിലുള്ള കോടിക്കണക്കിന് ഡോളറിെന്‍റ അമേരിക്കന്‍ പെന്‍ഷന്‍ ഫണ്ട് പിന്‍വലിക്കാനും ട്രംപ് ഉത്തരവിട്ടു. ഇത്തരം നടപടികള്‍ തുടര്‍ന്നും ഉണ്ടാകുമെന്ന സൂചനയും ട്രംപ് നല്‍കി. ചൈനക്കെതിരെ ഉപരോധം ഏര്‍പ്പെടുത്താന്‍ യു.എസ് സെനറ്റില്‍ പ്രമേയം അവതരിപ്പിച്ചതിനു പിന്നാലെയാണ് നടപടി.
