ന്യൂഡല്‍ഹി: രാജ്യത്ത്​ 24 മണിക്കൂറിനിടെ 13,586 പേര്‍ക്ക്​ പുതുതായി കോവിഡ്​ സ്​ഥിരീകരിച്ചു. ഇതോടെ രാജ്യത്തെ രോഗബാധിതരുടെ എണ്ണം 3,80,532 ആയി.

ഒറ്റ ദിവസം 13,000 ത്തില്‍ അധികം പേര്‍ക്ക്​ കോവിഡ്​ സ്​ഥിരീകരിക്കുന്നത്​ ആദ്യമായാണ്​. 336 മരണവും റിപ്പോര്‍ട്ട്​ ചെയ്​തു. രാജ്യത്തെ ആകെ കോവിഡ്​ മരണം 12,573 ആയി. 1,63,248 പേരാണ്​ ചികിത്സയിലുള്ളത്​. 2,04,711 പേര്‍ രോഗമുക്തി നേടുകയും ചെയ്​തതായി ആരോഗ്യമന്ത്രാലയം അറിയിച്ചു.

മഹാരാഷ്​ട്രയാണ്​ ഏറ്റവും കൂടുതല്‍ രോഗബാധിതരുള്ള സംസ്​ഥാനം. 24 മണിക്കൂറിനിടെ 3752 പേര്‍ക്കാണ്​ കോവിഡ്​ സ്​ഥിരീകരിച്ചത്​. 1,20,504 പേര്‍ക്ക്​​ ഇതുവരെ മഹാരാഷ്​ട്രയില്‍ കോവിഡ്​ ബാധിച്ചു​. മരണം 5751. 53,901 പേര്‍ ചികിത്സയിലുണ്ട്​. 60,838 പേര്‍ രോഗമുക്തി നേടി. മുംബൈയില്‍മാത്രം ഇതുവരെ 62,875 പേര്‍ക്ക്​ കോവിഡ്​ സ്​ഥിരീകരിച്ചു.

തമിഴ്​നാട്ടിലെ കോവിഡ്​ ബാധിതരുടെ എണ്ണം 50,000കടന്നു. 52,334 പേര്‍ക്കാണ്​ ഇതുവരെ രോഗം സ്​ഥിരീകരിച്ചത്​. മരണസംഖ്യ 625. വ്യാഴാഴ്​ച മാത്രം 49 മരണം സംസ്​ഥാനത്ത്​ റിപ്പോര്‍ട്ട്​ ചെയ്​തു. ചെന്നൈയില്‍ മാത്രം കോവിഡ്​ ബാധിതരുടെ എണ്ണം 37,000കടന്നു.