അബുദാബി : യു എ ഇ റസിഡന്റ് വിസയുള്ളവര്‍ക്ക് മടങ്ങി വരവിന് അംഗീകാരമായി. ഇതനുസരിച്ച്‌ ലോക്ക് ഡൗണ്‍ കാലയളവില്‍ യു എ ഇ ക്കു പുറത്തുകുടുങ്ങിപ്പോയ റെസിഡന്റ് വിസയുള്ള എല്ലാവര്‍ക്കും ജൂണ്‍ ഒന്ന് മുതല്‍ മടങ്ങിവരാനാകുമെന്ന് അധികൃതര്‍ വ്യക്തമാക്കി .

യു എ ഇ യിലേക്ക് മടങ്ങാന്‍ ആഗ്രഹിക്കുന്നവര്‍ ഫെഡറല്‍ അതോറിറ്റി ഫോര്‍ ഐഡന്റിറ്റി ആന്‍ഡ് സിറ്റിസണ്‍ഷിപ്പ് ( ഐ സി എ ) മന്ത്രാലയത്തിന്റെ വെബ് സൈറ്റില്‍ പേരുകള്‍ രജിസ്റ്റര്‍ ചെയ്തു മുന്‍‌കൂര്‍ അനുമതി നേടിയിരിക്കണം . അനുമതി നേടിക്കഴിഞ്ഞ ശേഷം മാത്രമേ വിമാനടിക്കറ്റ് ബുക്ക് ചെയ്യാവൂ എന്ന് അതോറിറ്റിയുടെ നിര്‍ദ്ദേശത്തില്‍ പറയുന്നു.

കഴിഞ്ഞ രണ്ടു മാസത്തിലേറെയായി കോവിഡ് മൂലം രാജ്യത്തിനകത്തേക്കുള്ള വിമാനയാത്രികരെ നിരോധിച്ചിരുന്ന സാഹചര്യത്തില്‍ ആയിരക്കണക്കിന് ആള്‍ക്കാര്‍ യു എ ഇ യിലേക്കെത്തുമെന്ന പ്രതീക്ഷയിലാണ് അധികൃതര്‍ . അപേക്ഷകരുടെ എണ്ണം കൂടുമ്ബോള്‍ അനുമതിക്കുള്ള സൂക്ഷമപരിശോധനക്ക് കൂടുതല്‍ സമയം വേണ്ടതിനാല്‍ വെബ്സൈറ്റില്‍ അപേക്ഷിച്ചവര്‍ അനുമതി രേഖാമൂലം വരുന്നതുവരെ കാത്തിരിക്കണം . അനുമതി ലഭിച്ചു കഴിഞ്ഞാല്‍ വിമാനയാത്രക്കുള്ള ഒരുക്കങ്ങള്‍ ആരംഭിക്കാം .

ഐ സി എ യുടെ സൈറ്റില്‍ ആദ്യം നിങ്ങളുടെ ഇമെയില്‍ വിലാസം അയച്ചുകൊടുക്കണം .അപ്പോള്‍ ലഭിക്കുന്ന ലിങ്കില്‍ പ്രവേശിച്ച്‌ ബാക്കിയുള്ള വിവരങ്ങള്‍ പൂരിപ്പിച്ച്‌ നല്‍കണം . പാസ്പോര്ട്ട് സൈസ് ഫോട്ടോ ,പാസ്പോര്ട്ട് ,വിസ കോപ്പി ,എന്തുകൊണ്ട് പുറത്തേക്കു യാത്ര ചെയ്തു എന്ന് കാണിക്കുന്നതിന് കമ്ബനിയുടെയോ , വിദ്യാഭ്യാസ സ്ഥാപനത്തിന്റെയോ , ചികിത്സക്കെങ്കില്‍ ആശുപത്രിയുടെയോ സാക്ഷ്യപത്രം , വിനോദ സഞ്ചാരത്തിന് പോയവര്‍ വിമാന ടിക്കറ്റുകളുടെ കോപ്പിയോ സമര്‍പ്പിക്കണം . ഇതിനു പ്രത്യേക ഫീസ് ഈടാക്കുന്നതല്ല എന്നും അറിയിച്ചിട്ടുണ്ട് .