തൃശൂര്‍: എന്‍ജിന്‍ തകരാറിലായതിനെ തുടര്‍ന്ന് അപകടത്തില്‍പ്പെട്ട ബോട്ടിലെ 40 മത്സ്യത്തൊഴിലാളികളെ രക്ഷപ്പെടുത്തി. വലപ്പാട് സ്വദേശിയായ വളപ്പില്‍ സുരേഷിന്റെ ഉടമസ്ഥതയിലുള്ള മഴവില്ല് എന്ന ഇന്‍ബോര്‍ഡ് വള്ളമാണ് അപകടത്തില്‍പ്പെട്ടത്. ചേറ്റുവ അഴിമുഖത്ത് നിന്ന് പുറപ്പെട്ട ബോട്ട് അഴീക്കോട് ലൈറ്റ് ഹൗസിന് പടിഞ്ഞാറ് രണ്ട് നോട്ടിക്കല്‍ മൈല്‍ പടിഞ്ഞാറ് വെച്ച്‌ എഞ്ചിന്‍ തകരാറിലായതിനെ തുടര്‍ന്ന് അപകടത്തിലാവുകയായിരുന്നു.
തുടര്‍ന്ന് തൃശൂര്‍ ഫിഷറീസ് ഡെപ്യൂട്ടി ഡയറക്ടര്‍ കെ.സുഗന്ധ കുമാരിയുടെ നിര്‍ദ്ദേശപ്രകാരം അഴീക്കോട് ഫിഷറീസ് റെസ്‌ക്യൂ ബോട്ട് വള്ളത്തേയും തൊഴിലാളികളേയും കരക്കെത്തിച്ചു. രക്ഷാപ്രവര്‍ത്തനത്തില്‍ സീഗാര്‍ഡുമാരായ അന്‍സാര്‍, ഫസല്‍, ഷിഹാബ് എന്നവര്‍ പങ്കെടുത്തു.
