ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DR Congo) അതീവ മാരകമായ എബോള വൈറസ് ബാധ അതിവേഗം പടരുന്നു. രാജ്യത്ത് ഇതുവരെ 550 പേർക്ക് രോഗബാധ സ്ഥിരീകരിച്ചതായും 101 മരണങ്ങൾ റിപ്പോർട്ട് ചെയ്തതായും ആരോഗ്യ മന്ത്രാലയം വ്യക്തമാക്കി. രോഗവ്യാപനത്തിന്റെ തോത് കുറഞ്ഞിട്ടില്ലെന്നും അതീവ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി. കോംഗോയുടെ കിഴക്കൻ പ്രവിശ്യയായ ഇട്ടൂരിയിലാണ് (Ituri) നിലവിൽ രോഗവ്യാപനം ഏറ്റവും രൂക്ഷം. ആകെയുള്ള കേസുകളിൽ 90 ശതമാനവും ഇവിടെയാണ്.

പ്രദേശവാസികൾക്കിടയിലുള്ള അന്ധവിശ്വാസങ്ങളും രോഗത്തെക്കുറിച്ചുള്ള തെറ്റിദ്ധാരണകളുമാണ് പ്രതിരോധ പ്രവർത്തനങ്ങൾക്ക് പ്രധാന തടസ്സമാകുന്നത്. പലയിടങ്ങളിലും ആരോഗ്യപ്രവർത്തകർക്ക് നേരെ അക്രമ സംഭവങ്ങളും റിപ്പോർട്ട് ചെയ്യുന്നുണ്ട്. പരിശോധനാ ഫലങ്ങൾ വരാൻ ആഴ്ചകൾ വൈകുന്നതും നിലവിലെ വകഭേദത്തിന് കൃത്യമായ വാക്സിനോ ചികിത്സയോ ലഭ്യമല്ലാത്തതും പ്രതിസന്ധി ഇരട്ടിയാക്കുന്നു. അതിനാൽ തന്നെ യഥാർത്ഥ രോഗബാധിതരുടെ എണ്ണം ഇതിലും എത്രയോ കൂടുതലായിരിക്കാമെന്നാണ് വിലയിരുത്തൽ.

എബോള വൈറസിന്റെ ആറ് വകഭേദങ്ങളിൽ അത്യപൂർവ്വവും അപകടകാരിയുമായ ‘ബൂൻഡി ബുഗ്യോ’ (Bundibugyo) വകഭേദമാണ് ഇപ്പോൾ കോംഗോയിൽ പടരുന്നത്. ഇതിന് മുൻപ് 2018-2020 കാലഘട്ടത്തിലുണ്ടായ എബോള വ്യാപനത്തിൽ കോംഗോയിൽ 2300-ലധികം പേർ മരിച്ചിരുന്നു.

രോഗപ്പകർച്ചയും ലക്ഷണങ്ങളും

മൃഗങ്ങളിൽ നിന്ന് മനുഷ്യരിലേക്കും തുടർന്ന് മനുഷ്യരിൽ നിന്ന് മനുഷ്യരിലേക്കും പകരുന്ന ജന്തുജന്യ രോഗമാണ് എബോള. രോഗബാധിതരായ മൃഗങ്ങളുടെ മാംസം ഭക്ഷിക്കുന്നതിലൂടെയോ, രോഗികളുടെ രക്തം, സ്രവങ്ങൾ, വിസർജ്യങ്ങൾ എന്നിവയുമായുള്ള സമ്പർക്കത്തിലൂടെയോ രോഗം പകരാം.

വൈറസ് ശരീരത്തിൽ പ്രവേശിച്ച് 2 മുതൽ 21 ദിവസത്തിനകം ലക്ഷണങ്ങൾ കണ്ട് തുടങ്ങും. പനി, കടുത്ത തലവേദന, പേശിവേദന, തൊണ്ടവേദന, ഛർദ്ദി, തൊലിപ്പുറത്തെ തിണർപ്പ് എന്നിവയാണ് പ്രാഥമിക ലക്ഷണങ്ങൾ. ഗുരുതരമാകുന്ന സാഹചര്യത്തിൽ 5 മുതൽ 7 ദിവസത്തിനകം ശരീരത്തിനകത്തും പുറത്തും രക്തസ്രാവം ഉണ്ടാവുകയും കരൾ, വൃക്ക തുടങ്ങിയ അവയവങ്ങളുടെ പ്രവർത്തനം തകരാറിലായി മരണം സംഭവിക്കുകയും ചെയ്യാം.

പ്രതിരോധ മാർഗ്ഗങ്ങൾ

നിലവിൽ അംഗീകൃത ചികിത്സ ലഭ്യമല്ലാത്തതിനാൽ പ്രതിരോധം മാത്രമാണ് ഏക മാർഗ്ഗം.

  • മാംസാഹാരങ്ങൾ ശരിയായി വേവിച്ച് മാത്രം കഴിക്കുക.
  • രോഗബാധിതരുമായോ അവരുടെ സ്രവങ്ങളുമായോ നേരിട്ടുള്ള സമ്പർക്കം പൂർണ്ണമായി ഒഴിവാക്കുക.
  • രോഗ ലക്ഷണങ്ങൾ കണ്ടാലുടൻ രോഗിയെ ഐസൊലേഷനിലേക്ക് മാറ്റുകയും വിദഗ്ദ്ധ സപ്പോർട്ടീവ് ചികിത്സ ലഭ്യമാക്കുകയും ചെയ്യുക.