ലോകത്തെ പിടിച്ചുലച്ച ഊർജ പ്രതിസന്ധിക്കും പശ്ചിമേഷ്യയിലെ യുദ്ധഭീതിക്കും ഒടുവിൽ താൽക്കാലിക ശമനമാകുന്നു. ഇറാൻ വിഷയത്തിൽ ഇന്ന് വൈകിട്ടോടെ കൂടുതൽ വിവരങ്ങൾ പുറത്ത് വരുമെന്നും സംഘർഷഭരിതമായ ഹോർമുസ് കടലിടുക്കുമായി ബന്ധപ്പെട്ട് ഏതാനും മണിക്കൂറുകൾക്കുള്ളിൽ ശുഭവാർത്ത ഉണ്ടാകാൻ സാധ്യതയുണ്ടെന്നും നിലവിൽ ഇന്ത്യ സന്ദർശിക്കുന്ന യു.എസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കി.
ഞായറാഴ്ച ന്യൂഡൽഹിയിൽ കേന്ദ്ര വിദേശകാര്യ മന്ത്രി എസ് ജയ്ശങ്കറുമായി നടത്തിയ സംയുക്ത വാർത്താസമ്മേളനത്തിനിടെയാണ് റൂബിയോ ഇക്കാര്യം വ്യക്തമാക്കിയത്. ഹോർമുസ് കടലിടുക്കിലെ സാഹചര്യം പരിഹരിക്കാൻ സഹായിക്കുന്ന ഒരു രൂപരേഖയുടെ കാര്യത്തിൽ കഴിഞ്ഞ 48 മണിക്കൂറിനുള്ളിൽ ചില പുരോഗതികൾ ഉണ്ടായിട്ടുണ്ടെന്ന് അദ്ദേഹം പറഞ്ഞു.
