നീറ്റ് (യുജി) 2026 പുനഃപരീക്ഷ എഴുതുന്ന വിദ്യാർത്ഥികൾക്കായി നാഷണൽ ടെസ്റ്റിംഗ് ഏജൻസി നൽകിയിട്ടുള്ള വിവരങ്ങളിൽ തിരുത്തൽ വരുത്താനുള്ള വിൻഡോ (Correction window) ഔദ്യോഗികമായി തുറന്നു. ജൂൺ 21-ന് നടക്കാനിരിക്കുന്ന പുന:പരീക്ഷയ്ക്ക് മുന്നോടിയായി ഉദ്യോഗാർത്ഥികൾക്ക് തങ്ങളുടെ നിലവിലെ വിലാസവും പരീക്ഷ എഴുതാൻ താൽപര്യമുള്ള നഗരങ്ങളും ഇതിലൂടെ പുതുക്കാവുന്നതാണ്.
ക്രമക്കേടുകളെ കുറിച്ചുള്ള ആശങ്കകളെയും ചോദ്യപ്പേപ്പർ ചോർച്ച ആരോപണങ്ങളെയും തുടർന്ന് മെയ് മൂന്നിന് നടന്ന നീറ്റ്-യുജി 2026 പരീക്ഷ റദ്ദാക്കിയ സാഹചര്യത്തിലാണ് ഈ പുതിയ നീക്കം. പുതുക്കിയ പരീക്ഷ ജൂൺ 21 ഞായറാഴ്ച രാജ്യത്തുടനീളം പെൻ ആൻഡ് പേപ്പർ (ഓഫ്ലൈൻ) മോഡിൽ നടക്കും. നാഷണൽ ടെസ്റ്റിംഗ് ഏജൻസി പുറപ്പെടുവിച്ച ഏറ്റവും പുതിയ പൊതു അറിയിപ്പ് അനുസരിച്ച്, പരീക്ഷാ നടപടിക്രമങ്ങൾക്കായി അനുവദിച്ച സമയം ഉൾപ്പെടെ ഉച്ചയ്ക്ക് 2 മുതൽ വൈകുന്നേരം 5:15 വരെ പരീക്ഷ നടക്കും.
