ഇടവേളയ്ക്കുശേഷം വിപണിയിൽ തിരിച്ചെത്തിയ ചൈനയിലെ പ്രാദേശിക ബ്രാൻഡുകളുടെ കുതിപ്പിൽ കാലിടറി ആപ്പിൾ ഐഫോണുകൾ. വാവേ (huawei) ടെക്നോളജി കമ്പനിയിൽ നിന്നാണ് ആപ്പിളിന് ഏറ്റവും വലിയ വെല്ലുവിളി ഉയർന്നിരിക്കുന്നത്. അമേരിക്കയുടെ ഭാഗത്തുനിന്നും കടുത്ത വിലക്കുകൾ നേരിട്ട് വിപണിയിൽ പിന്നോട്ട് പോയശേഷം കമ്പനിയുടെ തിരിച്ചുവരവ് അമ്പരപ്പിക്കുന്ന നിലയിലാണ്. അമേരിക്ക തടഞ്ഞുവെച്ചതെല്ലാം സ്വന്തമായി വികസിപ്പിച്ചെടുത്താണ് കമ്പനി വിപണിയിൽ കുതിക്കുന്നത്. കഴിഞ്ഞവർഷം കമ്പനി പുറത്തിറക്കിയ സ്മാർട്ട്ഫോൺ അമേരിക്കയെ പോലും അമ്പരപ്പിച്ചു. തങ്ങളുടെ എല്ലാ വിലക്കുകൾക്കും അപ്പുറം ഇവർ എങ്ങനെ പുതിയ സ്മാർട്ട്ഫോൺ പുറത്തിറക്കി എന്നതാണ് അതിനു കാരണം.
സാങ്കേതികവും ഭൗമശാസ്ത്രപരവുമായ തടസ്സങ്ങൾ മറികടന്നുള്ള ഈ മുന്നേറ്റത്തിൽ ചൈനയിൽ പൊടുന്നനെ തിരിച്ചടിയേറ്റത് ആപ്പിൾ കമ്പനിയുടെ ആധിപത്യത്തിനാണ്. വാവേ പുറത്തിറക്കിയ പുതിയ സ്മാർട്ട്ഫോണുകൾ ആപ്പിൾ ഐഫോണുകൾക്കെതിരെ തുറന്ന മത്സരമായി. ഇതിലൂടെ ആപ്പിളിന്റെ ചൈനയിലെ നിലനിൽപ്പ് പോലും അപകടത്തിലാകുന്ന സ്ഥിതിയാണ്.
കഴിഞ്ഞവർഷം ആപ്പിൾ പുറത്തിറക്കിയ ഐഫോൺ 15 സീരീസ് ചൈനയിൽ വിറ്റഴിക്കപ്പെട്ടത് വളരെ മോശം നിലയിലായിരുന്നു. വാവേ പോലുള്ള എതിരാളികളിൽ നിന്നുണ്ടായ കടുത്ത മത്സരമാണ് ഇതിന് കാരണമായി ചൂണ്ടിക്കാട്ടപ്പെട്ടത്. ഐഫോൺ 14 നെ അപേക്ഷിച്ച് ഐഫോൺ 15 വിൽപ്പന നാലര ശതമാനം താഴേക്ക് പോയി. ഫോൺ പുറത്തിറക്കി ആദ്യത്തെ 17 ദിവസത്തെ കണക്കുകൾ വിശകലനം ചെയ്ത് കൗണ്ടർപോയിന്റ് റിസർച്ചാണ് ഇക്കാര്യം പറഞ്ഞത്. വാവേ ചൈനീസ് വിപണിയിൽ ആപ്പിളിനെ തീർത്തും നിഷ്പ്രഭരാക്കിയെന്നും ഇതിലൂടെ ഐഫോൺ 15 വിൽപ്പന രണ്ടക്ക ശതമാനം ഇടിഞ്ഞു എന്നുമാണ് ജഫറീസ് അനലിസ്റ്റ് എന്ന സ്ഥാപനം റിപ്പോർട്ട് ചെയ്തത്.
മേറ്റ്‌ 60 പ്രോ സ്മാർട്ട്ഫോണാണ് വാവേക്ക് വൻ കുതിപ്പ് സാധ്യമാക്കിയത്. 2024 സാമ്പത്തിക വർഷത്തിൽ ആദ്യ പാദത്തിൽ ചൈനയിൽ ആപ്പിൾ ഐഫോണുകളുടെ വില്പന 19% ഇടിഞ്ഞിരുന്നു. 2020 നു ശേഷം ചൈനയിൽ കമ്പനിയുടെ ഏറ്റവും മോശം പ്രകടനമായിരുന്നു ഇത്. ഇതിന് പിന്നാലെ ആഗോള വിപണിയിൽ ആപ്പിൾ 19.7 ശതമാനത്തിൽ നിന്ന് 15.7 ശതമാനത്തിലേക്ക് താഴ്ന്നു. അതേസമയം വാവേയുടെ വില്പന 70% കുതിച്ചു. കഴിഞ്ഞ ആഴ്ച പുര 70 സീരിയസ് പുറത്തിറക്കിയ വാവേ വിപണിയിൽ വീണ്ടും വലിയ സ്വാധീനം ഉറപ്പിക്കാനാണ് ശ്രമിക്കുന്നത്. വിലയിൽ ഒപ്പോയും വിവോയും ഷവോമിയും വൻ മത്സരം ആപ്പിളിനു മുന്നിൽ വയ്ക്കുമ്പോൾ, ഹൈ എന്റ് ഉൽപ്പന്നങ്ങൾ പുറത്തിറക്കിയാണ് വാവേ വലിയ മുന്നേറ്റം സാധ്യമാക്കുന്നത്.
സ്വന്തം ചിപ്പ്
സ്വന്തമായി വികസിപ്പിച്ചെടുത്ത ചിപ്പ് ആണ് വാവേയ്ക്ക് കരുത്താകുന്നത്. അവരുടെ ഏറ്റവും പുതിയ അഡ്വാൻസ്ഡ് പ്രോസസർ ചൈനീസ് നിർമ്മിതമാണ്. കഴിഞ്ഞവർഷമാണ് ഇത് പുറത്തിറക്കിയത്. ഇതിലൂടെയാണ് ചിപ്പ് വിവാദത്തിൽ നിലനിൽപ്പ് പോലും അപകടത്തിൽ ആയ ചൈനീസ് കമ്പനിയുടെ മടങ്ങിവരവ് സാധ്യമായത്. 7 – നാനോമീറ്റർ ചിപ് ചൈനയ്ക്ക് ചിന്തിക്കാൻ പോലും കഴിയില്ലെന്ന അമേരിക്കൻ ബുദ്ധിയെ അമ്പരപ്പിച്ചാണ് വാവേ തങ്ങളുടെ മേറ്റ്‌ 60 പ്രൊ പുറത്തിറക്കിയത്. സെമികണ്ടക്ടർ മാനുഫാക്ചറിങ് ഇന്റർനാഷണൽ കോർപ്പറേഷൻ വികസിപ്പിച്ച കിരിൻ 9000-ന്റെ അപ്ഡേറ്റ് വേർഷനായ കിരിൻ 9010 പ്രൊസസ്സറാണ് വാവേയുടെ ഏറ്റവും പുതിയ പുര 70 സ്മാർട്ട്ഫോൺ സീരീസിൽ ഉൾപ്പെടുത്തിയിരിക്കുന്നത്. പുറത്തിറക്കി രണ്ടുദിവസത്തിനുള്ളിൽ തന്നെ പുര 70 മുഴുവൻ ഫോണുകളും വിറ്റഴിക്കപ്പെട്ടു എന്നാണ് റിപ്പോർട്ട്. ആധുനിക സെമികണ്ടക്ടർ ഉത്പാദനത്തിൽ വാവേയേ തടഞ്ഞിടാനുള്ള അമേരിക്കയുടെ ശ്രമം വിപണിയിൽ ചൈനീസ് കമ്പനികളുടെ മുന്നേറ്റം കുറയ്ക്കാൻ വേണ്ടി കൂടി ലക്ഷ്യമിട്ടായിരുന്നു. എന്നാൽ 2023 ഓഗസ്റ്റ് മാസത്തിൽ മേറ്റ്‌ 60 പ്രൊ സ്മാർട്ഫോൺ രംഗത്തിറക്കി വാവേ ഇതിനു മറുപടി നൽകി. ഇതിലൂടെ വാവേക്കും ചൈനയ്ക്കും 5ജി ചിപ്പുകൾ ഉൽപ്പാദിപ്പിക്കാനുള്ള ശേഷിയുണ്ട് എന്നുകൂടി അർത്ഥമാക്കുന്നുണ്ട്.
