ന്യൂഡല്ഹി: പ്രധാനമന്ത്രി നരേന്ദ്ര മോദിക്കെതിരേ ഡല്ഹിയിലെ രാംലീല മൈതാനിയില് പ്രതിഷേധം. ബിജെപിയുടെ ഡല്ഹി നിയമസഭാ തെരഞ്ഞെടുപ്പ് പ്രചാരണത്തിനു തുടക്കംകുറിച്ച് രാംലീലയില് നടത്തിയ പാര്ട്ടി യോഗത്തിലാണു മോദിക്കെതിരേ പ്രതിഷേധമുണ്ടായത്.
പൗരത്വ ഭേദഗതി നിയമത്തെകുറിച്ചു പ്രധാനമന്ത്രി പരാമര്ശിക്കവെയാണു കാണികള്ക്കിടയില്നിന്ന് ഒരാള് എഴുന്നേറ്റുനിന്നു പ്രതിഷേധിച്ചത്. ഇയാളെ പോലീസ് ബലപ്രയോഗത്തിലൂടെ മാറ്റി. പൗരത്വ നിയമം രാജ്യത്തിന്റെ നല്ല ഭാവിക്കു വേണ്ടിയാണ് എന്നു പറഞ്ഞപ്പോഴാണ് ഒരാള് പ്രതിഷേധവുമായി എഴുന്നേറ്റതെന്നു റിപ്പോര്ട്ടുകള് പറയുന്നു. പ്രതിഷേധിച്ച ആളെക്കുറിച്ചുള്ള കൂടുതല് വിവരങ്ങള് ലഭ്യമല്ല. ഇയാളെ ജനക്കൂട്ടത്തിനിടയില്നിന്നു പുറത്താക്കി എന്നു മാത്രമാണു പോലീസ് നല്കുന്ന വിശദീകരണം.