കൊച്ചി: പ്രൊഡ്യൂസേഴ്സ് അസോസിയേഷന്‍ പ്രഖ്യാപിച്ച വിലക്കു നീക്കാന്‍ അഭിനേതാക്കളുടെ സംഘടനയായ ‘അമ്മ’ നടത്തുന്ന ചര്‍ച്ചകളില്‍ പ്രതീക്ഷയുണ്ടെന്നു നടന്‍ ഷെയ്ന്‍ നിഗം. വിവാദങ്ങളെത്തുടര്‍ന്നു ചിത്രീകരണം നിര്‍ത്തിവച്ച ‘വെയില്‍’ അടക്കമുള്ള മൂന്നു സിനിമകളും പൂര്‍ത്തിയാക്കും. ആ ചിത്രങ്ങള്‍ പൂര്‍ത്തിയാക്കില്ലെന്ന് എവിടെയും പറഞ്ഞിട്ടില്ല. വ്യാജക്കരാറാണു പ്രൊഡ്യൂസേഴ്സ് അസോസിയേഷനു മുന്പില്‍ തനിക്കെതിരേ ‘ഉല്ലാസം’ സിനിമയുടെ പ്രവര്‍ത്തകര്‍ സമര്‍പ്പിച്ചിരിക്കുന്നത്. അതു ചോദ്യം ചെയ്യപ്പെട്ടതിനെത്തുടര്‍ന്നു മാറ്റുകയായിരുന്നു. ഇക്കാര്യങ്ങള്‍ അസോസിയേഷനു തന്നെ അറിവുള്ളതാണ്. സഹിക്കാവുന്നതിലും അധികം ബുദ്ധിമുട്ടുകള്‍ ഉണ്ടായതിനെത്തുടര്‍ന്നാണ് പരസ്യ പ്രതിഷേധവുമായി രംഗത്തെത്തിയത്. അക്കാര്യങ്ങള്‍ കഴിഞ്ഞ ദിവസം നടത്തിയ ചര്‍ച്ചയില്‍ സിദ്ദിഖിനും ഇടവേള ബാബുവിനും മനസിലായിട്ടുണ്ട്. അതിനാല്‍ ഇനി ‘അമ്മ’ നടത്താന്‍ പോകുന്ന അനുരഞ്ജന ചര്‍ച്ചകളിലാണ് എല്ലാ പ്രതീക്ഷയുമെന്ന് ഷെയ്ന്‍ പറഞ്ഞു. ചിത്രീകരണത്തില്‍ സഹകരിച്ചില്ലെന്ന’വെയില്‍’ സിനിമാ പ്രവര്‍ത്തകരുടെ ആരോപണങ്ങള്‍ തെറ്റാണെന്നും ഷെയ്ന്‍ പറഞ്ഞു.
“അമ്മ’ നടത്തുന്ന ചര്‍ച്ചകളില്‍ പ്രതീക്ഷ; ഷെയ്ന്‍ നിഗം
