മജിസ്‌ട്രേറ്റിനെ ചേംബറില്‍ കയറി വെല്ലുവിളിച്ചതിന് പുറമെ ഹൈക്കോടതി ഉത്തരവിനെതിരെ തിരുവനന്തപുരം ബാര്‍ അസോസിയേഷന്റെ പ്രമേയം. വാഹനാപകട കേസിലെ നഷ്ടപരിഹാരം ഓണ്‍ലൈനായി കക്ഷികള്‍ക്ക് നല്‍കണമെന്ന ഉത്തരവിനെതിരെയാണ് പ്രമേയം. പ്രമേയത്തിന്റെ പകര്‍പ്പ് മാതൃഭൂമി ന്യൂസിന് ലഭിച്ചു.
ഹൈക്കോടതിയുടെ 3/2019 നമ്ബര്‍ സര്‍ക്കുലര്‍ അനുസരിച്ചുള്ള ഉത്തരവിനെതിരെയാണ് തിരുവനന്തപുരം ബാര്‍ അസോസിയേഷന്റെ വിവാദ നടപടി. വാഹനാപകടക്കേസിലെ നഷ്ടപരിഹാര തുക ബാങ്ക് അക്കൗണ്ട് വഴി കക്ഷികള്‍ക്ക് നേരിട്ട് നല്‍കാനായിരുന്നു ഉത്തരവ്. ഇടനിലക്കാരടക്കം നഷ്ടപരിഹാരത്തുക കക്ഷികളില്‍ നിന്ന് തട്ടിയെടുക്കുന്നത് തടയാനായിരുന്നു കോടതി ഉത്തരവിറക്കിയത്. എന്നാല്‍ ഇതിന് പിന്നാലെ തിരുവനന്തപുരം ബാര്‍ അസോസിയേഷന്‍ പ്രമേയം പാസാക്കുകയായിരുന്നു.
അഭിഭാഷകരുടെ അവകാശങ്ങള്‍ക്കെതിരെയാണ് കോടതിയുടെ നടപടിയെന്നും അദാലത്തുകളില്‍ നിന്ന് അഭിഭാഷകര്‍ വിട്ടുനില്‍ക്കണമെന്നും നിര്‍ദ്ദേശിക്കുന്നതായിരുന്നു പ്രമേയം. ഇതേപ്പറ്റി ഹൈക്കോടതി ചീഫ് ജസ്റ്റിസ്, ജില്ലാ ജഡ്ജി എന്നിവരെ അറിയിക്കാനും പ്രമേയ തീരുമാനത്തിലുണ്ട്. പ്രമേയവുമായി എല്ലാ അഭിഭാഷകരും സഹകരിക്കാനും നിര്‍ദ്ദേശമുണ്ടായിരുന്നു. അതേസമയം ബാര്‍ അസോസിയേഷന്‍ നടപടി അസാധാരണമെന്നാണ് മുതിര്‍ന്ന നിയമവിദഗ്ധര്‍ പറയുന്നത്.
വഞ്ചിയൂര്‍ കോടതിയില്‍ മജിസ്‌ട്രേറ്റിനെ ചേംബറില്‍ കയറി കൈയേറ്റത്തിന് ശ്രമിച്ചത് വിവാദമായിരുന്നു. ഇതിന് പിന്നാലെയാണ് ബാര്‍ അസോസിയേഷന്റെ മറ്റൊരു നടപടിയും വിവാദമാകുന്നത്.
