ഷാര്‍ജ : വിദ്യാര്‍ഥിയെ കെട്ടിടത്തില്‍ നിന്ന് വീണ് മരിച്ച നിലയില്‍ കണ്ടെത്തി. അല്‍ ഖാസിമിയ ഏരിയയില്‍ ജോര്‍ദാനി കുടുംബത്തിലെ പതിനൊന്നാം ക്ലാസ് വിദ്യാര്‍ഥിയാണ് മരിച്ചത്. ഇന്നലെ 12.45നായിരുന്നു സംഭവം. താഴെ വീണയുടന്‍ തന്നെ കുട്ടിയെ കുവൈറ്റി ആശുപത്രിയിലെത്തിച്ചെങ്കിലും രക്ഷപ്പെടുത്താന്‍ സാധിച്ചില്ല. തലയ്‌ക്കേറ്റ മാരകമായ പരിക്കാണ് മരണകാരണം.
വിദ്യാര്‍ത്ഥി ജീവനൊടുക്കിയതാണെന്ന സംശയത്തിലാണ് പോലീസ്. പഠനത്തില്‍ മികവ് പുലര്‍ത്തിയിരുന്ന വിദ്യാര്‍ഥിയുടെ പിതാവ് വളരെ കര്‍ക്കശകാരനായിരുന്നെന്നും കഴിഞ്ഞ ദിവസം കൂട്ടുകാരോടൊപ്പം വൈകിയെത്തിയതിന് വീട്ടില്‍ കയറ്റിയില്ലെന്നും ഒരു സുഹൃത്ത് പറഞ്ഞു. സംഭവ ദിവസം പിതാവ് കുട്ടിയെ റോഡില്‍ വച്ച്‌ മര്‍ദിച്ചതായും വിവരമുണ്ട്. മാതാപിതാക്കള്‍ ഇപ്പോള്‍ പോലീസ് കസ്റ്റഡിയിലാണ്. വിദ്യാര്‍ഥിക്ക് രണ്ട് സഹോദരങ്ങളുണ്ട്.
