കണ്ണൂര്‍: ശബരിമലയിലെ യുവതീ പ്രവേശന വിധിയില്‍ പുനപരിശോധന ആവശ്യപ്പെട്ടു കൊണ്ടുള്ള ഹര്‍ജികളില്‍ സുപ്രീംകോടതി നാളെ വിധി പറയാനിരിക്കെ പ്രതികരിച്ച്‌ ശബരിമലയില്‍ കയറിയ ബിന്ദു അമ്മിണിയും കനകദുര്‍ഗയും. വിധി പുനപ്പരിശോധിക്കാന്‍ സാധ്യതയില്ലെന്നും ഒരു തവണ മല കയറിയതിനാല്‍ വീണ്ടും ശബരിമലയിലേയ്ക്കില്ലെന്നും ബിന്ദുവും കനകദുര്‍ഗയും പറഞ്ഞു.
’50 വയസിന് താഴെയുള്ള സ്ത്രീകള്‍ക്കും ശബരിമലയിലെത്താമെന്ന വിധി വന്നശേഷം ഞങ്ങള്‍ മല കയറിയതോടെ കോടതി വിധി നടപ്പിലായി. ഇനി വീണ്ടും ഞങ്ങള്‍ തന്നെ ശബരിമലയില്‍ പോകുന്നതില്‍ അര്‍ത്ഥമില്ല. ഇനി പുതിയ ആളുകള്‍ പോകട്ടെ.’, ബിന്ദു പറഞ്ഞു. തിരുവോണ സമയത്ത് കേരളത്തിനകത്തും പുറത്തുമുള്ള രണ്ട് സ്ത്രീകള്‍ ശബരിമലയില്‍ പ്രവേശിച്ചിട്ടുണ്ടെന്നും മലകയറാന്‍ തയ്യാറായി വരുന്ന യുവതികള്‍ക്ക് സഹായം ചെയ്യുമെന്നും ബിന്ദു വ്യക്തമാക്കി.
‘ചിലരൊക്കെ ശബരിമലയില്‍ പോകാന്‍ താല്‍പ്പര്യം പ്രകടിപ്പിക്കുന്നുണ്ട്. ഇവരെ സഹായിക്കാന്‍ ‘നവോത്ഥാന കേരളം സ്ത്രീപക്ഷ കൂട്ടായ്മ’യെന്ന പേരില്‍ കൂട്ടായ്മയുമുണ്ട്.’, ബിന്ദു പറഞ്ഞു.
ശബരിമലയില്‍ യുവതീപ്രവേശനം സാധ്യമാക്കിക്കൊണ്ട് കഴിഞ്ഞ വര്‍ഷം സുപ്രീംകോടതി വിധി പറഞ്ഞിരുന്നു. ഇതിനെതിരെ നല്‍കിയ 56 പുനപ്പരിശോധനാ ഹര്‍ജികളാണ് കോടതി നാളെ പരിഗണിക്കുക. വിധി എന്താണെങ്കിലും സ്വീകരിക്കുമെന്ന് ദേവസ്വം ബോര്‍ഡ് പ്രസിഡന്റ് എ പത്മകുമാര്‍ പറഞ്ഞിരുന്നു. തങ്ങള്‍ക്ക് ശുഭപ്രതീക്ഷയുണ്ടെന്നും അദ്ദേഹം കൂട്ടിച്ചേര്‍ത്തു.
