പാരീസ്: വൈദികരുടെ പീഡനത്തിന് ഇരയായവർക്ക് നഷ്ടപരിഹാരം നൽകാനൊരുങ്ങി ഫ്രാൻസിലെ റോമൻ കത്തോലിക്കാ സഭ. ഇരകളെന്ന് ബിഷപ്പിന് ബോധ്യപ്പെട്ടവർക്കായിരിക്കും നഷ്ടപരിഹാരം അനുവദിക്കുക. ഇതിനായ വിശ്വാസികളിൽനിന്നും സംഭാവനകൾ ക്ഷണിക്കുന്നതായും ഫ്രാൻസിലെ റീംസ് ആർച്ച് ബിഷപ്പ് എറിക് ഡി മൗലിൻസ്-ബ്യൂഫോർട്ട് വ്യക്തമാക്കി. കൂടാതെ ഇരകൾക്ക് നഷ്ടപരിഹാരം നൽകുന്നതിനായി ഫ്രാൻസിലെ സഭയിലെ ലൈംഗിക അതിക്രമം പരിശോധിക്കുന്ന കമ്മീഷന് 5.5 മില്ല്യൺ യൂറോ (39 കോടി രൂപ) അനുവദിക്കാനും ബിഷപ്പുമാരുടെ യോഗം തീരുമാനിച്ചു.
സഭയുടെ ഭാഗത്തുനിന്നും ഉണ്ടായ പ്രതികരണമില്ലായ്മ, ശ്രദ്ധക്കുറവ് തുടങ്ങിയ വീഴ്ചകൾ തിരിച്ചറിഞ്ഞ് പ്രവർത്തിക്കുമെന്ന് റീംസിലെ ആർച്ച് ബിഷപ്പ് വ്യക്തമാക്കി. 120 ബിഷപ്പുമാരുടെ സാന്നിധ്യത്തിൽ ചേർന്ന വാർഷിക യോഗത്തിലാണ് തീരുമാനം.

ഇരകൾക്ക് എങ്ങനെ പണം നൽകുമെന്നുള്ള കാര്യത്തിൽ തീരുമാനമായിട്ടില്ല. കൂടുതൽ പദ്ധതികൾ വരുന്ന ഏപ്രിലിൽ ചേരുന്ന യോഗത്തിൽ തീരുമാനിക്കുമെന്നും ബിഷപ്പ് വ്യക്തമാക്കി. 2016ൽ ഒരു ഓൺലൈൻ വാർത്താ മാധ്യമം നടത്തിയ അന്വേഷണത്തിൽ 50 വർഷത്തിനിടെ 342 ലൈംഗിക പീഡന കേസുകളാണ് സഭയുമായി ബന്ധപ്പെട്ട് രജിസ്റ്റർ ചെയ്കിരിക്കുന്നത്. വിദേശത്തും സ്വദേശത്തുമായി നടന്ന ലൈംഗിക പീഡന കേസുകൾ ബിഷപ്പുമാരുടെ നേതൃത്വത്തിൽ മൂടിവെക്കപ്പെട്ടു.

തന്റെ രൂപതയിലെ വൈദികൾ പ്രായപൂർത്തിയാകാത്ത കുട്ടിളെ പീഡിപ്പിച്ചുവെന്ന വിവരം മറച്ചുവെച്ചതിന് ലിയോണിലെ ബിഷപ്പ് ഫിലിപ്പ് ബാർബറിനെ ഫ്രഞ്ച് കോടതി ആറ് മാസത്തെ തടവിന് ശിക്ഷിച്ചിരുന്നു. ബിഷപ്പ് അപ്പീൽ പോയതിനെത്തുടർന്ന് നവംബർ 28ന് കേസിൽ കോടതി വിധി പറയും.