വിവാഹ വാഗ്ദാനം നല്കി ലൈംഗിക ബന്ധത്തിലേര്‍പ്പെട്ട ശേഷം ഉപേക്ഷിക്കുന്നത് കുറ്റകരമല്ലെന്ന് ഡല്‍ഹി ഹൈക്കോടതി. ഉഭയ സമ്മതപ്രകാരം ലൈംഗിക ബന്ധത്തില്‍ ഏര്‍പ്പെട്ട കമിതാവിനെ പിരിയുന്നത് നിയമപ്രകാരം കുറ്റകരമല്ലെന്ന് കോടതി. പ്രായപൂര്‍ത്തിയായ വ്യക്തികള്‍ സ്വന്തം ഇഷ്ടപ്രകാരം ലൈംഗിക ബന്ധത്തില്‍ ഏര്‍പ്പെടുന്നത് കുറ്റമായി കാണാനാകില്ലെന്നും കോടതി വ്യക്തമാക്കി.
ലൈംഗിക ബന്ധത്തിനു ശേഷം വിവാഹ വാഗ്ദാനത്തില്‍ നിന്നു പിന്മാറിയ വ്യക്തി തന്നെ ബലാല്‍സംഗം ചെയ്തു എന്നാരോപിച്ച്‌ ഒരു സ്ത്രീ നല്കിയ ബലാത്സംഗ കേസ് തള്ളിക്കൊണ്ടാണ് കോടതി ഉത്തരവ്. പ്രായപൂര്‍ത്തിയായ വ്യക്തിക്ക് ലൈംഗിക ബന്ധം നിഷേധിക്കാനുള്ള സ്വാതന്ത്ര്യം ഉണ്ട്. അതുകൊണ്ട് പരസ്പര സമ്മതത്തോടെ ലൈംഗികമായി ബന്ധപെട്ടാല്‍ അത് കുറ്റകരമല്ല.
വിവാഹവാഗ്ദാനം നല്കി 2016 -ല്‍ ബലാത്സംഗം ചെയ്തുവെന്നാണ് യുവതി പൊലീസില്‍ പരാതി നല്കിയത്. അമ്മയെ കാണാന്‍ വീട്ടിലേക്ക് വിളിച്ചു വരുത്തിയ ശേഷം പീഡിപ്പിച്ചെന്നായിരുന്നു പരാതി. ആദ്യത്തെ ലൈംഗിക ബന്ധം കഴിഞ്ഞ് മൂന്ന് മാസത്തിനു ശേഷം ഇരുവരും ഉഭയസമ്മതപ്രകാരം വീണ്ടും ഒരു ഹോട്ടല്‍ മുറിയില്‍ വെച്ച്‌ ലൈംഗികമായി ബന്ധപ്പെട്ടതായും കോടതി കണ്ടെത്തി. അതിനാല്‍ വിവാഹ വാഗ്ദാനം നല്കി പീഡിപ്പിച്ചതായി കരുതാനാവില്ലെന്നും കോടതി നിരീക്ഷിച്ചു.
അതേസമയം, വിചാരണ കോടതി യുവാവിനെ വെറുതെ വിട്ടിരുന്നു. ശേഷം ഹൈക്കോടതിയെ സമീപിക്കുകയായിരുന്നു. എന്നാല്‍ വിചാരണ കോടതിയുടെ വിധിയില്‍ ഇടപെടേണ്ട സാഹചര്യം ഇപ്പോഴില്ലെന്ന് ഡല്‍ഹി ഹൈക്കോടതി നിരീക്ഷിച്ചു.
