തിരുവനന്തപുരം: കുമ്മനം രാജശേഖരനെ ഒഴിവാക്കി ബിജെപി ഉപതെരഞ്ഞെടുപ്പ് സ്ഥാനാര്‍ഥി പട്ടിക പ്രഖ്യാപിച്ചു. വട്ടിയൂര്‍ക്കാവില്‍ ജില്ലാ പ്രസിഡന്‍റ് എസ്. സുരേഷാണു സ്ഥാനാര്‍ഥി. കോന്നിയില്‍ കെ. സുരേന്ദ്രനും അരൂരില്‍ കെ.പി. പ്രകാശ് ബാബുവും എറണാകുളത്തു സി.ജി. രാജഗോപാലും മഞ്ചേശ്വരത്തു രവീശതന്ത്രി കുണ്ടാറുമാണു ബിജെപി സ്ഥാനാര്‍ഥികള്‍.
കുമ്മനം രാജശേഖരന്‍, വി.വി. രാജേഷ്, സുരേഷ് എന്നിവരുടെ പേരുകളാണു വട്ടിയൂര്‍ക്കാവില്‍ പരിഗണിച്ചിരുന്നത്. മുതിര്‍ന്ന നേതാവ് ഒ. രാജഗോപാല്‍ ശനിയാഴ്ച കുമ്മനത്തിന്‍റെ സ്വാനാര്‍ഥിത്വം പ്രഖ്യാപിക്കുകയും ചെയ്തിരുന്നു. എന്നാല്‍ വി. മുരളീധരന്‍പക്ഷത്തിലെ ചില നേതാക്കള്‍ കുമ്മനത്തിനെതിരേ എതിര്‍പ്പുയര്‍ത്തി. ഇതേതുടര്‍ന്ന് മണ്ഡലത്തില്‍ ബിജെപിക്കു തെരഞ്ഞെടുപ്പു പ്രചാരണം നിര്‍ത്തിവയ്ക്കേണ്ട അവസ്ഥയുണ്ടായി.
ഇതിനുപിന്നാലെയാണു കുമ്മനത്തെ ഒഴിവാക്കിയുള്ള സ്ഥാനാര്‍ഥി പട്ടികയ്ക്കു ബിജെപി ദേശീയ നേതൃത്വത്തിന്‍റെ അംഗീകാരം ലഭിക്കുന്നത്. ആദ്യം മത്സരിക്കാന്‍ താത്പര്യം പ്രകടിപ്പിച്ചിരുന്നില്ലെങ്കിലും ആര്‍എസ്‌എസ് നേതൃത്വവും ശ്രീധരന്‍പിള്ള വിഭാഗവും ആവശ്യപ്പെട്ടതോടെ “പാര്‍ട്ടി പറഞ്ഞാല്‍’ മത്സരിക്കാമെന്ന നിലപാടിലേക്കു കുമ്മനം എത്തിയിരുന്നു. ഇതിനു പിന്നാലെയാണു കുമ്മനത്തെ ഒഴിവാക്കി സ്ഥാനാര്‍ഥി പട്ടിക പ്രഖ്യാപിക്കുന്നത്.
കോന്നിയില്‍ കെ. സുരേന്ദ്രനു പുറമേ ശോഭ സുരേന്ദ്രന്‍റെ പേരാണു പരിഗണനയിലുണ്ടായിരുന്നത്. എന്നാല്‍ അവസാന ലാപ്പില്‍ വിജയസാധ്യത മുന്‍നിര്‍ത്തി സുരേന്ദ്രനെ ബിജെപി ദേശീയ നേതൃത്വം കോന്നിയില്‍ നിയോഗിക്കുകയായിരുന്നു. ഉപതെരഞ്ഞെടുപ്പില്‍ മത്സരിക്കാനില്ലെന്നായിരുന്നു മുന്പ് സുരേന്ദ്രന്‍റെ നിലപാട്. പാര്‍ലമെന്‍റ് തെരഞ്ഞെടുപ്പില്‍ മത്സരിച്ച്‌ പരാജയപ്പെട്ടവരാണ് ശോഭയും സുരേന്ദ്രനും. അരൂരില്‍ പ്രകാശ് ബാബുവിന്‍റെ പേര് മാത്രമാണു പരിഗണനയിലുണ്ടായിരുന്നത്.
