മന്നം ട്രോഫി സ്വന്തമാക്കിയ ആറന്മുളയുടെ സ്വന്തം മേലുകര ചുണ്ടന്റെ വിജയാഘോഷത്തിനായി ഹൂസ്റ്റണിലെ നായര്‍ പ്ലാസ ഓഡിറ്റോറിയത്തില്‍ ഒത്തുകൂടിയത് ആയിരക്കണക്കിനു മലയാളികള്‍. വഞ്ചിപ്പാട്ടും, വിഭവസമൃദ്ധമായ ഭക്ഷണവും പങ്കിട്ട് അവര്‍ ഉതൃട്ടാതി ജലോത്സവത്തില്‍ കിരീടം ചൂടിയ മേലുകര ചുണ്ടന് ആഭിവാദ്യങ്ങര്‍പ്പിച്ചു. ഹൂസ്റ്റണിലെ ശ്രീഗുരുവായൂരപ്പന്‍ ക്ഷേത്രം പ്രസിഡന്റും ഫോമയുടെ സ്ഥാപക പ്രസിഡന്റും ആറന്മുള മേലുകര സ്വദേശിയുമായ ശശിധരന്‍ നായരുടെ നേതൃത്വത്തിലായിരുന്നു ആഘോഷപരിപാടികള്‍. ജാതിമതഭേദ്യമന്യേ ഹൂസ്റ്റണിലെ ബഹുഭൂരിപക്ഷം മലയാളികളും ചടങ്ങിനെത്തിയിരുന്നു.
ആറന്മുളയില്‍ നടന്ന മന്നം ട്രോഫി വള്ളംകളിയിലാണ് ലക്ഷങ്ങള്‍ മുടക്കി പുതുക്കിപണിത മേലുകര ചുണ്ടന് വിജയതിലകമണിഞ്ഞത്. ശശിധരന്റെ നായരുടെ വീടിന്റെ വടക്കേയറ്റത്തുള്ള വെച്ചൂര്‍ മനയ്ക്കല്‍ കടവിലാണ് മേലുകര ചുണ്ടന്റെ വള്ളപ്പുര. ഇവിടെയാണ് ആറന്മുളയപ്പന്റെ തിരുവോണത്തോണി അടുക്കുന്നതും. ശശിധരന്‍ നായരുടെ അമ്മാവന്‍ രാമകൃഷ്ണനായിരുന്നു ഒരു കാലത്ത് ഈ ചുണ്ടന്‍വള്ളത്തിന്റെ അമരക്കാരന്‍. അന്നു തൊട്ടേ ഈ ചുണ്ടനുമായി ശശിധരന്‍ നായര്‍ക്ക് അഭേദ്യബന്ധമുണ്ടായിരുന്നു. 45 വര്‍ഷമായി അമേരിക്കയില്‍ സ്ഥിര താമസക്കാരനാണ് അദ്ദേഹം. ഇത്തവണ ഓണത്തിനു നാട്ടില്‍ പോകാന്‍ കഴിഞ്ഞില്ല. ആറന്മുളയപ്പന്‍ തോന്നിച്ചതാവാം, അതു കൊണ്ടു തന്നെ മേലുകര ചുണ്ടന്റെ വിജയാഘോഷം ഇവിടെ നടത്താമെന്നു കരുതി, അദ്ദേഹം പറഞ്ഞു.
നായര്‍ പ്ലാസയിലെത്തിയ എല്ലാവര്‍ക്കും ഹൃദയത്തിന്റെ ഭാഷയില്‍ നന്ദിയറിയിക്കുന്നുവെന്ന് ശശിധരന്‍ നായര്‍ പറഞ്ഞു.
