ധമാക്ക എന്ന ചിത്രത്തില്‍ മുകേഷിനെ ശക്തിമാനായി അവതരിപ്പിച്ച സംഭവത്തില്‍ സംവിധായകന്‍ ഒമര്‍ ലുലുവിനെതിരെ പരാതിയുമായി ‘ഒറിജിനല്‍ ശക്തിമാന്‍’ രംഗത്ത് വന്നത് വാര്‍ത്തയായിരുന്നു. ശക്തിമാനായി മിനിസ്‌ക്രീനില്‍ നിറഞ്ഞു നിന്നിരുന്ന മുകേഷ് ഖന്നയാണ് ഫെഫ്ക യൂണിയന്‍ പ്രസിഡന്റ് രഞ്ജി പണിക്കര്‍ക്ക് പരാതി അയച്ചത്. ശക്തിമാന്‍ കഥാപാത്രത്തിന്റെ പകര്‍പ്പാവകാശം തനിക്കാണെന്നും തന്റെ അനുവാദമില്ലാതെയാണ് ഒമര്‍ ലുലു ചിത്രത്തില്‍ നടന്‍ മുകേഷിനെ ആ വേഷത്തില്‍ അവതരിപ്പിച്ചിരിക്കുന്നതെന്നും പരാതിയില്‍ പറയുന്നു. ഒമര്‍ ലുലു ഈ നീക്കത്തില്‍ നിന്നും പിന്‍മാറണമെന്നും ഇല്ലെങ്കില്‍ നിയമത്തിന്റെ വഴി സ്വീകരിക്കുമെന്നും മുകേഷ് ഖന്ന പറഞ്ഞു.

സംഭവത്തില്‍ പ്രതികരണവുമായി രംഗത്ത് വന്നിരിക്കുകയാണ് ഒമര്‍ ലുലു. ശക്തിമാന്റെ വേഷത്തില്‍ മുകേഷ് ഒരു ചെറിയ രംഗത്തില്‍ മാത്രമേ വരുന്നുള്ളൂവെന്നും മുകേഷ് ഖന്ന അതൊരു മുഴുനീള വേഷമാണെന്ന് വിചാരിച്ചത് കൊണ്ടായിരിക്കാം പരാതി നല്‍കിയതെന്നും ഒമര്‍ ലുലു പറഞ്ഞു.

മുകേഷേട്ടന്‍ ശക്തിമാന്റെ രൂപത്തില്‍ ഒരു ചെറിയ സീനില്‍ മാത്രമേ വരുന്നുള്ളൂ. ഈ സിനിമ പൂര്‍ണമായും ശക്തിമാന്റെ കഥയാണെന്ന് മുകേഷ് ഖന്ന തെറ്റിദ്ധരിച്ചിട്ടുണ്ട് എന്ന് തോന്നുന്നു. അങ്ങനയല്ലാതെ അദ്ദേഹം കത്തയക്കില്ലല്ലോ. സംഭവത്തില്‍ ഞങ്ങള്‍ മുകേഷ് ഖന്നയ്ക്ക് വിശദീകരണം നല്‍കാനിരിക്കുകയാണ്. അദ്ദേഹം മനസ്സിലാക്കുമെന്ന് തന്നെയാണ് ഞങ്ങളുടെ പൂര്‍ണ വിശ്വാസം- ഒമര്‍ ലുലു

മുകേഷ് ഖന്ന ഫെഫ്കയ്ക്ക് അയച്ച കത്തിന്റെ പൂര്‍ണരൂപം

താങ്കളുടെ സംഘടനയിലെ അംഗമായ സംവിധായകന്‍ ഒമര്‍ ലുലു ധമാക്ക എന്ന പേരിലുള്ള പുതിയ ചിത്രത്തില്‍ ശക്തിമാന്‍ എന്ന കഥാപാത്രത്തെ ഉപയോഗിച്ചിരിക്കുന്നതായി അറിഞ്ഞു. മുകേഷ് എന്ന പേരുള്ള ഒരു നടനാണ് അതില്‍ അഭിനയിക്കുന്നതെന്നും അറിഞ്ഞു. സോഷ്യല്‍മീഡിയയിലൂടെ ഫോര്‍വേഡ് ചെയ്തു കിട്ടിയ ചില ചിത്രങ്ങളും ഞാന്‍ ഇതോടൊപ്പം ചേര്‍ക്കുന്നു.

ഭീഷ്മ് ഇന്റര്‍നാഷണലിന്റെ ബാനറില്‍ 1997ല്‍ ദൂരദര്‍ശനില്‍ പ്രക്ഷേപണം ചെയ്തിരുന്ന ശക്തിമാന്‍ എന്ന സീരിയലിലെ പ്രധാന നടനും നിര്‍മ്മാതാവുമാണ്ഞാന്‍. ശക്തിമാന്റെ കഥാപാത്രം,വേഷം, സീരിയലിലെ പശ്ചാത്തല സംഗീതം എന്നിവയുടെ പകര്‍പ്പാവകാശം എനിക്കാണ് . തന്റെ അനുവാദമില്ലാതെയാണ് ആ കഥാപാത്രത്തെ സിനിമയില്‍ ഉപയോഗിച്ചിരിക്കുന്നത്. ഇതിനെതിരെ പരാതി ഉന്നയിക്കാനാണ് ഈ കത്ത്. സംവിധായകന്‍ ഒമര്‍ ലുലു ഇതില്‍ നിന്നും പിന്‍മാറണം. ഇല്ലെങ്കില്‍ കര്‍ശന നിയമനടപടികള്‍ സ്വീകരിക്കും.