ന്യൂഡല്‍ഹി: ഡല്‍ഹി അന്താരാഷ്ട്ര വിമാനത്താവളത്തില്‍ ഇമിഗ്രേഷന്‍ ക്ലിയറന്‍സിനിടെ ഓഫീസറെ തല്ലിയ കനേഡിയന്‍ പൗരനെ തിരിച്ചയച്ചു. ബുധനാഴ്ച രാത്രിയാണ് സംഭവമുണ്ടായത്.
ലുത്ഹാന്‍സ എയര്‍ലൈന്‍സില്‍ മ്യൂണിക്കില്‍ നിന്ന് ഡല്‍ഹിയിലെത്തിയതായിരുന്നു കനേഡിയന്‍ പൗരന്‍. നിയമങ്ങളനുസരിച്ച്‌ വിവിധ രാജ്യങ്ങളിലെത്തുന്ന വിദേശികള്‍ ഇമിഗ്രേഷന്‍ ക്ലിയറന്‍സ് കഴിഞ്ഞതിന് ശേഷം മാത്രമേ ആ രാജ്യത്ത് പ്രവേശിക്കാവു . ഇമിഗ്രേഷന്‍ പരിശോധനക്കിടെ ഇതിനുള്ള ഫോമുകള്‍ കൃത്യമായി പൂരിപ്പിക്കാത്തത് ഉദ്യോഗസ്ഥന്‍ ചൂണ്ടിക്കാട്ടി. ഇമിഗ്രേഷന്‍ നിയമങ്ങള്‍ അറിയില്ലേയെന്നും ചോദിച്ചു. ഇതിന് പിന്നാലെ ഉദ്യോഗസ്ഥനെ കനേഡിയന്‍ പൗരന്‍ മര്‍ദ്ദിക്കുകയായിരുന്നു.
തുടര്‍ന്ന് ഇമിഗ്രേഷന്‍ വകുപ്പ് ഡല്‍ഹി പൊലീസിന് പരാതി നല്‍കുകയും നിയമം അനുസരിച്ച്‌ ഇയാളെ ലുത്ഹാന്‍സ എയര്‍ലൈന്‍സില്‍ തന്നെ തിരിച്ചയക്കുകയുമായിരുന്നു.
