വള്ളിക്കുന്നത്തെ വനിതാ പോലീസ് ഉദ്യോഗസ്ഥ സൗമ്യയെ പെട്രോളൊഴിച്ച്‌ തീകൊളുത്തി കൊന്നത് പ്രണയനൈരാശ്യം മൂലമെന്ന് പ്രതി അജാസിന്റെ മൊഴി. സൗമ്യയെ കൊന്ന ശേഷം ആത്മഹത്യ ചെയ്യാനാണ് താന്‍ പദ്ധതിയിട്ടിരുന്നതെന്നും അജാസ് ആലപ്പുഴ ഒന്നാം ക്ലാസ് മജിസ്‌ട്രേറ്റിന് മൊഴി നല്‍കി.
സൗമ്യയുമായി തനിക്ക് അഞ്ച് വര്‍ഷത്തിലേറെയായി അടുപ്പമുണ്ടെന്നാണ് അജാസ് പറയുന്നത്. എന്നാല്‍ വിവാഹം കഴിക്കാനുള്ള ആഗ്രഹം അറിയിച്ചപ്പോള്‍ സൗമ്യ നിരസിച്ചു.തന്റെ കൈയ്യില്‍ നിന്ന് വാങ്ങിയ പണം തിരികെ നല്‍കുകയും വിളിച്ചാല്‍ ഫോണ്‍ എടുക്കാതിരിക്കുകയും ചെയ്തതോടെ ദേഷ്യമായി. അവഗണന താങ്ങാനാകാതെ വന്നതോടെ തീരുമാനമെടുത്തു. ഒന്നിച്ച്‌ ജീവിക്കാന്‍ കഴിയില്ലെന്ന് ഉറപ്പായാതോടെ ഒന്നിച്ചു മരിക്കാന്‍ തീരുമാനിച്ചു. അങ്ങനെയാണ് കൊലപാതകത്തിലേയ്ക്ക് എത്തിയത്. സൗമ്യയെ കൊല്ലണമെന്ന് ഉറപ്പിച്ച്‌ കൊച്ചിയില്‍ നിന്ന് ആയുധങ്ങളും പെട്രോളും കരുതിയാണ് അജാസ് കാറില്‍ വള്ളിക്കുന്നത്ത് എത്തിയത്. സൗമ്യ സഞ്ചരിച്ച സ്‌കൂട്ടറില്‍ കാറിടിച്ച്‌ വീഴ്ത്തിയ ശേഷം ആയുധം ഉപയോഗിച്ച്‌ വെട്ടിയും കുത്തിയും നിലത്തിട്ടു. തുടര്‍ന്ന് സൗമ്യയുടെ ശരീരത്തിലും സ്വന്തം ശരീരത്തിലും പെട്രോള്‍ ഒഴിച്ച ശേഷം തീ കൊളുത്തുകയായിരുന്നു. ഇങ്ങനെയാണ് തനിക്കും പൊള്ളലേറ്റത്. എന്നാല്‍ കൃത്യത്തില്‍ വേറെ ആര്‍ക്കും പങ്കില്ലെന്നും അജാസ് പറഞ്ഞെന്നാണ് വിവരം.
40 ശതമാനത്തിലേറെ പൊള്ളലേറ്റ അജാസ് ആലപ്പുഴ മെഡിക്കല്‍ കോളേജ് ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്. ഇയാളുടെ വൃക്കകളുടെ പ്രവര്‍ത്തനം തകരാറിലാണ്. ഇന്നലെ ഡയാലിസിസിന് ശ്രമിച്ചെങ്കിലും ഉയര്‍ന്ന രക്തസമ്മര്‍ദ്ദം മൂലം സാധിച്ചില്ല. അജാസിന് വ്യക്തമായി സംസാരിക്കാന്‍ സാധിക്കാതിരുന്നതിനാല്‍ ഇതുവരെ അന്വേഷണസംഘത്തിന് ചോദ്യം ചെയ്യാന്‍ കഴിഞ്ഞിട്ടില്ല.
കൊല്ലപ്പെട്ട സൗമ്യയുടെ മൃതദേഹം ഓച്ചിറയിലെ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ഭര്‍ത്താവ് സജീവ് നാളെ നാട്ടിലെത്തും.നാളെയാണ് സംസ്‌കാരം.
