കേരള സംഗീത നാടക അക്കാദമി പുരസ്‌ക്കാരങ്ങള്‍ നിരസിച്ച് നാടകപ്രവര്‍ത്തകര്‍. പ്രൊഫഷണല്‍ നാടക മത്സരത്തിലെ നിര്‍ണയം സുതാര്യമല്ലെന്ന് ആരോപിച്ചാണ് പ്രതിഷേധവുമായി നാടകപ്രവര്‍ത്തകര്‍ രംഗത്തെത്തിയത്. പ്രൊഫഷണല്‍ നാടകങ്ങള്‍ക്കുള്ള പ്രധാന അവാര്‍ഡുകളെല്ലാം അക്കാദമി നിര്‍വാഹക സമിതി അംഗത്തിന്റെ നാടകങ്ങള്‍ക്ക് തന്നെയാണ് ലഭിച്ചിരിക്കുന്നത്.
സംഗീത നാടക അക്കാദമി സംഘടിപ്പിച്ച പ്രൊഫഷണല്‍ നാടക മത്സരത്തിലെ ജേതാക്കളാണ് പുരസ്‌ക്കാരം നിരസിച്ച് രംഗത്തെത്തിയത്. നാടക സമിതിക്കുള്ള ആനുകൂല്യങ്ങള്‍ വെട്ടിക്കുറച്ച അക്കാദമിയുടെ നടപടി പുനപരിശോധിക്കണമെന്നും കലാകാരന്മാര്‍ ആവശ്യപ്പെട്ടു.
അമച്വര്‍, തീയറ്റര്‍ നാടകങ്ങള്‍ക്കായി അക്കാദമി ലക്ഷങ്ങള്‍ ചിലവഴിക്കുന്നുവെന്നും പ്രൊഫഷണല്‍ നാടക സമിതികള്‍ക്ക് നല്‍കിയിരുന്ന സബ്‌സിഡി ഇല്ലാതാക്കിയെന്നും നാടകപ്രവര്‍ത്തകര്‍ ചൂണ്ടിക്കാട്ടി. മികച്ച സംവിധായകനുള്ള പുരസ്‌ക്കാരം നേടിയ രാജീവന്‍ മമ്മിളി, മികച്ച നാടക രചയിതാവിനുള്ള പുരസ്‌ക്കാരം നേടിയ പ്രദീപ് കുമാര്‍ എന്നിവര്‍ അവാര്‍ഡുകള്‍ നിരസിച്ചതായി അക്കാദമിയെ അറിയിച്ചു.
