കേന്ദ്ര വിദേശകാര്യ സഹമന്ത്രിയായി ചുമതലയേറ്റ ശേഷം ആദ്യമായി കേരളത്തില്‍ എത്തിയ വി.മുരളീധരന് ബിജെപി ജില്ലാ നേതൃത്വം ആവേശോജ്വല സ്വീകരണം നല്‍കി. തീരുമാനിച്ചതിലും വൈകി ഉച്ചയ്ക്ക് പന്ത്രണ്ടരയോടെ തിരുവനന്തപുരം വിമാനത്താവളത്തിലെ ഡൊമസ്റ്റിക് ടെര്‍മിനലില്‍ വന്നിറങ്ങിയ മുരളീധരന് ഉജ്വല സ്വീകരണമാണ് വിമാനത്താവളത്തില്‍ നല്‍കിയത്. എയര്‍ ഇന്ത്യാ വിമാനത്തില്‍ഡല്‍ഹിയില്‍ നിന്ന് ചെന്നൈയില്‍ എത്തിയശേഷം ചെന്നൈയില്‍ നിന്ന് ഇന്‍ഡിഗോ വിമാനത്തിലാണ് മുരളീധരന് എത്തിയത്.
ബിജെപി ജില്ലാ പ്രസിഡന്റ് അഡ്വ.എസ്.സുരേഷിന്റെ നേതൃത്വത്തിലാണ് ബിജെപി ജില്ലാ നേതൃത്വത്തിന്റെ ആഭിമുഖ്യത്തില്‍ വിമാനത്താവളത്തില്‍ സ്വീകരണം നല്‍കിയത്. വിമാനത്താവളത്തിലെ സ്വീകരണത്തിന് ശേഷം വാഹനജാഥയായാണ് മുരളീധരനെ പഴവങ്ങാടിയില്‍ എത്തിച്ചത്. പഴവങ്ങാടിയില്‍ ക്ഷേത്രത്തില്‍ എത്തിയ മുരളീധരന് പഴവങ്ങാടി ഗണപതിയുടെ മുന്‍പില്‍ തേങ്ങയുടച്ചു. ബിജെപി ജില്ലാ പ്രസിഡന്റ് എസ്.സുരേഷും ജില്ലാ ജനറല്‍ സെക്രട്ടറി പാപ്പനംകോട് സജിയും മുരളീധരന് തേങ്ങ എടുത്ത് നല്‍കി.
തേങ്ങ ഉടച്ച്‌ പുറത്തിറങ്ങിയ മുരളീധരന് ക്ഷേത്രത്തിനു മുന്നില്‍ ബിജെപി അണികള്‍ ഉജ്ജ്വല സ്വീകരണം നല്‍കി. രാവിലെ പതിനൊന്നോടെ തന്നെ മുരളീധരന് അണികള്‍ എത്തിയെങ്കിലും വിമാനം വൈകിയ കാരണം ഒന്നരയോടെയാണ് അദ്ദേഹം പഴവങ്ങാടി എത്തിയത്. രാവിലെ പതിനൊന്നിന് മുരളീധരന് വിമാനത്താവളത്തിലും പതിനൊന്നു മുപ്പതിന് പഴവങ്ങാടിയിലും സ്വീകരണം എന്നാണ് മുന്‍പ് അറിയിച്ചിരുന്നത്.
പഴവങ്ങാടി ക്ഷേത്രത്തില്‍ തേങ്ങ ഉടച്ചശേഷം അലങ്കരിച്ച തുറന്ന ജീപ്പിലാണ് മുരളിധരന്‍ സംസ്ഥാന കമ്മറ്റി ഓഫീസിലേക്ക് പോയത്. അലങ്കരിച്ച വാഹനത്തില്‍ മുരളിധരന്‍ സ്വീകരണങ്ങളേറ്റു വാങ്ങി പോകുമ്ബോള്‍ വിമാനത്താവളം മുതല്‍ മുരളീധരന് അനുഗമിച്ച വാഹനങ്ങള്‍ സംസ്ഥാന കമ്മറ്റി ഓഫീസ് വരെ മുരളീധരനെ അനുഗമിച്ചു. സംസ്ഥാന കമ്മറ്റി ഓഫീസില്‍ സംസ്ഥാന പ്രസിഡന്റ് പി.എസ് .ശ്രീധരന്‍ പിള്ളയും മറ്റു ബിജെപി നേതാക്കളും മുരളീധരനെ സ്വീകരിച്ചു. തുടര്‍ന്ന് മുരളീധരന് വാര്‍ത്താ സമ്മേളനത്തിലേക്ക് നീങ്ങി. .ദുബായില്‍ വാഹനാപകടത്തില്‍ മരണപ്പെട്ട മലയാളികളുടെ മൃതദേഹങ്ങള്‍ നാട്ടിലെത്തിക്കാനുള്ള നടപടികള്‍ താന്‍ ആരംഭിച്ചതായും മുരളീധരന് പറഞ്ഞു.
പരിക്കേറ്റവരുടെ വിവരങ്ങള്‍ അറിയിക്കാനായി ദുബായില്‍ കണ്ട്രോള്‍ റൂം തുറന്നു. വിദേശത്ത്, പ്രത്യേകിച്ച്‌ ഗള്‍ഫ് രാജ്യങ്ങളില്‍ വച്ച്‌ മരിക്കുന്നവരുടെ മൃതദേഹങ്ങള്‍ നാട്ടിലെത്തിക്കാനും വേണ്ട നടപടികള്‍ വിദേശകാര്യ വകുപ്പ് സ്വീകരിക്കും. മൃതദേഹത്തിന്റെ തൂക്കം നോക്കി ഇതിന്റെ ഇതിനുള്ള കൂലി ഈടാക്കുന്ന സംവിധാനവും അവസാനിപ്പിക്കും. ഇതിന് പരിഹാരം നിശ്ചയിക്കാനും വ്യോമയാന മന്ത്രിയുമായി കൂടിക്കാഴ്ച നടത്തും. ഉത്സവകാലങ്ങളില്‍ വിമാനക്കൂലികള്‍ ക്രമാതീതമായി വര്‍ധിക്കുന്നതിന് പരിഹാരം കാണാന്‍ കേന്ദ്ര വ്യോമയാന മന്ത്രി ഹര്‍ദീപ് സിങ് പുരിയുമായി താന്‍ കൂടിക്കാഴ്ച നടത്തിയതായും മുരളീധരന് പറഞ്ഞു.
മോദി സര്‍ക്കാറിന്റെ രണ്ടാമൂഴത്തിനു പിന്നില്‍ പ്രധാനം വിദേശകാര്യ വകുപ്പിന്റെ പ്രവര്‍ത്തനമാണെന്നും, ലോകത്തിന്റെ മുന്‍പില്‍ ഇന്ത്യയുടെ സ്ഥാനം അത് ഉയര്‍ത്തിയെന്നും പ്രധാനമന്ത്രി തന്നോട് പറഞ്ഞതായി മുരളീധരന് പറഞ്ഞു. സുഷമ സ്വരാജിന്റെ കീഴിലുണ്ടായിരുന്ന വകുപ്പിന്റെ പ്രവര്‍ത്തനം അതുപോലെ തുടര്‍ന്ന് കൊണ്ടുപോകാന്‍ ശ്രമിക്കണമെന്നും പ്രധാനമന്ത്രി നിര്‍ദ്ദേശിച്ചതായും മുരളീധരന് പറഞ്ഞു.
വിദേശകാര്യ മന്ത്രാലയം പ്രവാസികള്‍ക്കായി ഈ നമ്ബറില്‍ 00971565463903 ഹെല്‍പ്പ്‌ലൈന്‍ ആരംഭിച്ചിട്ടുണ്ട്. കേന്ദ്ര ആരോഗ്യമന്ത്രി ഹര്‍ഷ് വര്‍ദ്ധനുമായി താന്‍ ഇന്നലെ കൂടിക്കാഴ്ച നടത്തിയെന്നും നിപ രോഗബാധയെ കുറിച്ച്‌ തങ്ങള്‍ ചര്‍ച്ച ചെയ്തുവെന്നും കേരളത്തിലെ സ്ഥിതിഗതികള്‍ കേന്ദ്ര ആരോഗ്യവകുപ്പ് സസൂക്ഷ്മം നിരീക്ഷിച്ചുകൊണ്ടിരിക്കുകയാണ്. നിപയുടെ കാര്യത്തില്‍ ആശങ്കപ്പെണ്ട ഒരു സ്ഥിതിവിശേഷം കേരളത്തില്‍ റിപ്പോര്‍ട്ട് ചെയ്യപ്പെട്ടിട്ടില്ലെന്നും നിപ ബാധിച്ചവരുടെയും അവരുമായി ഇടപെട്ടവരെയും കുറിച്ചുള്ള വിവരങ്ങള്‍ കേന്ദ്ര സര്‍ക്കാരിന്റെ കൈവശം ഉണ്ട്. നിപ പടര്‍ന്നുപിടിക്കാന്‍ സാധ്യതയില്ലെന്നാണ് കേന്ദ്രം ഇപ്പോള്‍ വിലയിരുത്തുന്നത്. ഇക്കാര്യത്തില്‍ ആശങ്കപ്പെടേണ്ടതില്ലെന്നും ആരോഗ്യമന്ത്രി അറിയിച്ചതായി മുരളീധരന് പറഞ്ഞു. 17,18 തീയതികളില്‍ എംപിമാരുടെ സത്യപ്രതിഞ്ജയും, 20ന് സ്പീക്കര്‍ തിരഞ്ഞെടുപ്പും നടക്കുമെന്നും മുരളിധരന്‍ പറഞ്ഞു.
