മകന്‍ മുറിയില്‍ മരിച്ചു കിടക്കുന്നതറിയാതെ അമ്മ വീടിനുള്ളില്‍ കഴിഞ്ഞത് മൂന്നു ദിവസം. പത്തനംതിട്ട ഇടത്തറ കൊമ്പനോലി പാലത്തിങ്കല്‍ റിട്ട. ബി.ഡി.ഒ പരേതനായ പി.എ ജോര്‍ജിന്റെ മകന്‍ ജോബി പി ജോര്‍ജിന്റെ (45) മരണമാണ് അമ്മ അറിയാതിരുന്നത്. അമ്മ ലീലാമ്മയും ജോബിയുമാണ് വീട്ടില്‍ താമസം. ഇലക്ട്രീഷനായ ജോബി നാലു വര്‍ഷം മുന്‍പ് പിതാവു മരിച്ചപ്പോള്‍ സൗദിയിലെ ജോലി നിര്‍ത്തി നാട്ടിലേക്ക് വന്നതാണ്. ശനി വൈകിട്ട് ജോബിയെ റോഡില്‍ കണ്ടവരുണ്ട്. ഇന്നലെ രാവിലെ ലീലാമ്മയുടെ ബന്ധു ലാലി ഇവരെ സന്ദര്‍ശിക്കാന്‍ വീട്ടിലെത്തിയപ്പോഴാണ് മരണ വിവിരം പുറത്തറിയുന്നത്. ജോബി ഭക്ഷണം കഴിച്ച ശേഷം കിടക്കുകയാണെന്നാണ് അമ്മ പറഞ്ഞത്. സംശയം തോന്നിയ ലാലി മുറിയില്‍ നോക്കിയപ്പോള്‍ മരിച്ചു കിടക്കുന്നതാണ് കാണുന്നത്. മൃതദേഹത്തിനു മൂന്നു ദിവസത്തെ പഴക്കമുണ്ടെന്നു പോലീസ് വ്യക്തമാക്കി. ഉടന്‍ തന്നെ ഫൊറന്‍സിക് വിദഗ്ദരും സ്ഥലത്തെത്തി. പത്തനംതിട്ട ജനറല്‍ ആശുപത്രിയില്‍ പോസ്റ്റുമോര്‍ട്ടം നടത്തിയ ശേഷം മൃതദേഹം ബന്ധുക്കള്‍ക്ക് വിട്ടുകൊടുത്തു. ഭര്‍ത്താവ് ജോര്‍ജിന്റെ മരണ ശേഷം ലീലാമ്മ മാനസിക പ്രശ്‌നങ്ങള്‍ കാണിച്ചിരുന്നതായി ബന്ധുക്കള്‍ പോലീസിനെ അറിയിച്ചു.
Monday 2nd of 2023
