കൊച്ചി: പടക്കശേഖരണശാലയിലുണ്ടായ ഉഗ്ര സ്ഫോടനത്തില്‍ നിന്ന് പ്രദേശവാസികള്‍ ഇതുവരെ മുക്തരായിട്ടില്ല. അപകടം പ്രദേശത്തെ ജനങ്ങൾക്ക് വലിയ മാനസീക ബുദ്ധിമുട്ട് ഉണ്ടാക്കിയിട്ടുണ്ടെന്ന് സമീപവാസികള്‍ പറഞ്ഞു. ഇത്തരത്തില്‍ ഒരു ഉഗ്ര സ്ഫോടനം ഉണ്ടാകുമെന്ന് ആരും തന്നെ പ്രതീക്ഷിച്ചിരുന്നില്ല. ടെംപോ ട്രാവലറില്‍നിന്ന് പടക്കങ്ങള്‍ ഇറക്കി അടുത്തുള്ള കോണ്‍ക്രീറ്റ് കെട്ടിടത്തിലേക്ക് മാറ്റുന്നതിനിടെയാണ് പൊട്ടിത്തെറിയുണ്ടായത്.

പുതിയകാവ് ക്ഷേത്രത്തിലെ ഉത്സവത്തോട് അനുബന്ധിച്ചുള്ള വെടിക്കെട്ടിനായി കൊണ്ടുവന്ന കരിമരുന്ന് വാഹനത്തിൽനിന്നു പടക്കപ്പുരയിലേക്ക് ഇറക്കുമ്പോഴായിരുന്നു പൊട്ടിത്തെറിച്ചത്. ഒരാള്‍ മരിച്ചു. തിരുവനന്തപുരം ഉള്ളൂര്‍ സ്വദേശിയായ വിഷ്ണു എന്ന യുവാവാണ് മരിച്ചത്. 16 പേര്‍ക്കാണ് സ്ഫോടനത്തില്‍ പരിക്കേറ്റത്. വാഹനത്തിലുണ്ടായിരുന്ന വിഷ്ണുവിനും ഒപ്പം ഉണ്ടായിരുന്നയാള്‍ക്കുമാണ് സ്ഫോടനത്തില്‍ ഗുരുതരമായി പരിക്കേറ്റത്. ഇരുവരെയും തൃപ്പൂണിത്തുറ താലൂക്ക് ആശുപത്രിയിലെത്തിച്ചെങ്കിലും വിഷ്ണുവിന്‍റെ ജീവന്‍ രക്ഷിക്കാനായില്ല. ഗുരുതരമായി പരുക്കേറ്റ നാലു പേരെ കളമശേരി മെഡിക്കൽ കോളജ് ആശുപത്രിയിലേക്കു മാറ്റിയിട്ടുണ്ട്.

സ്ഫോടനത്തില്‍ പടക്കക്കട പൂര്‍ണമായും തകര്‍ന്നു. ഉത്സവത്തിന് വെടിക്കോപ്പുകള്‍ ശേഖരിക്കുന്നതിനായി ജനവാസകേന്ദ്രത്തിലെ വീടാണ് ഗോഡൗണാക്കി മാറ്റിയത്. അവിടേക്കെത്തിച്ച വെടിക്കോപ്പുകള്‍ ഇറക്കുന്നതിനിടെയാണ് പൊട്ടിത്തെറിച്ചത്. ഗോഡൗണാക്കി മാറ്റിയ ഈ വീടും സ്ഫോടകവസ്തുക്കളെത്തിച്ച വാഹനവും പൊട്ടിത്തെറിയില്‍ പൂര്‍ണമായും തകര്‍ന്നിട്ടുണ്ട്. കനത്തച്ചൂടില്‍ വെടിക്കോപ്പുകള്‍ പൊട്ടിത്തെറിച്ചതാകാമെന്നാണ് പ്രാഥമിക നിഗമനമെന്ന് ഡിവിഷന്‍ കൗണ്‍സിലര്‍ പറഞ്ഞു. രാവിലെ 10.30 ഓടെ നല്ല വെയിലുള്ള സമയത്താണ് പടക്കം ഇറക്കാന്‍ ശ്രമിച്ചത്. സ്ഫോടനത്തിലേക്ക് നയിച്ച യഥാര്‍ഥ കാരണം ഇപ്പോഴും വ്യക്തമായിട്ടില്ല. സ്ഫോടനത്തിന്‍റെ അവശിഷ്ടങ്ങള്‍ അരക്കിലോമീറ്ററോളം ദൂരത്തേക്ക് തെറിച്ചുവീഴുകയും ചെയ്തു.

45 ഓളം വീടുകള്‍ക്കാണ് സ്ഫോടനത്തില്‍ കേടുപാടുകളുണ്ടായത്. മുന്നൂറ് മീറ്റർ അകലെവരെ സ്ഫോടനത്തിന്‍റെ പ്രകമ്പനമുണ്ടായി. ഇന്ന് (തിങ്കളാഴ്ച) പത്തര മണിയോടെയാണ് സ്ഫോടനം ഉണ്ടായത്. അരക്കിലോമീറ്റര്‍ ചുറ്റപാടുള്ള വീടുകളെല്ലാം തകര്‍ന്നനിലയിലാണ്. സമീപത്തെ ഇരുനിലവീടുകളുടെ മേല്‍ക്കൂരകള്‍ വരെ തകര്‍ന്നിട്ടുണ്ട്.

അതേസമയം, പുതിയകാവ് ക്ഷേത്രോത്സവത്തിന് വെടിക്കെട്ട് നടത്തുന്നതിന് അമ്പലക്കമ്മിറ്റിക്ക് അനുമതി നൽകിയിരുന്നില്ലെന്നും അനധികൃതമായാണ് സ്ഫോടക വസ്തുക്കൾ സൂക്ഷിച്ചിരുന്നതെന്നും പോലീസ് സ്ഥിരീകരിച്ചു. വെടിക്കെട്ട് നടത്തരുതെന്ന് അമ്പലക്കമ്മിറ്റിക്കും പടക്ക കരാറുകാർക്കും നിർദേശം നൽകിയിരുന്നു. വെടിക്കെട്ടിന് അനുമതി നൽകിയിരുന്നില്ല. അനുമതി ഇല്ലാതെയാണ് പുതിയകാവ് ക്ഷേത്രത്തിൽ ഇന്നലെ തെക്കുംപുറം വിഭാഗം സ്ഫോടകവസ്തുക്കൾ പൊട്ടിച്ചത്.