കൊച്ചി: കൊച്ചിയിൽ മാരക മയക്കുമരുന്നുമായി യുവതിയടക്കം മൂന്നുപേരെ പോലീസ് അറസ്റ്റു ചെയ്തു. കൊല്ലം വലിയകുളങ്ങര സ്വദേശി റിജു (41), കോട്ടയം കുറവിലങ്ങാട് സ്വദേശി ഡിനോ ബാബു (32), കണ്ണൂർ ധർമടം സ്വദേശിനി മൃദുല (38) എന്നിവരാണ് അറസ്റ്റിലായത്. കടവന്ത്രയിലെ ആഡംബര ഹോട്ടലിൽ നടത്തിയ പരിശോധനയിലാണ് മൂവരും പിടിയിലായത്. ഇവരിൽനിന്ന് 19.82 ഗ്രാം എംഡിഎംഎയും 45 ഗ്രാം ഹാഷിഷ് ഓയിലും പിടിച്ചെടുത്തു.

മയക്കുമരുന്ന് വിൽപന നടത്താനായാണ് മൂവരും ഹോട്ടലിൽ മുറിയെടുത്ത് താമസിച്ചതെന്ന് പോലീസ് പറഞ്ഞു. ഇവരിൽനിന്ന് മയക്കുമരുന്ന് തൂക്കാൻ ഉപയോഗിക്കുന്ന ഡിജിറ്റൽ വെയിങ് മെഷീൻ പിടിച്ചെടുത്തു. സ്ത്രീകളെ മുൻനിർത്തിയാണ് ഇവർ മയക്കുമരുന്ന് കടത്തുന്നതും വിൽപന നടത്തുന്നതും.

പിടിയിലായ റിജു വഞ്ചനാക്കേസടക്കം വിവിധ കേസുകളിൽ പ്രതിയാണ്. തൃക്കാക്കര, മൂവാറ്റുപുഴ, കോതമംഗലം, കഞ്ഞിക്കുഴി, ചങ്ങനാശേരി, പേട്ട, പുത്തൂർ തുടങ്ങിയ വിവിധ പോലീസ് സ്റ്റേഷനുകളിൽ ഇയാൾക്കെതിരെ കേസുകൾ രജിസ്റ്റർ ചെയ്തിട്ടുണ്ട്. മുൻപും മയക്കുമരുന്ന് കേസിൽ റിജുവിനെ കടവന്ത്ര പോലീസ് പിടികൂടിയിട്ടുണ്ട്. കോതമംഗലം പിണ്ടിമനയിലായിരുന്നു ഇയാളുടെ താമസം. പ്രതി ഡിനോ ബാബുവും വഞ്ചനാക്കേസുകളിൽ പ്രതിയാണ്.