രാജ്യതലസ്ഥാനത്ത് വായുവിന്റെ ഗുണനിലവാരത്തിൽ നേരിയ പുരോഗതി. മൂന്ന് ദിവസത്തിന് ശേഷമാണ് ഗുണനിലവാരം ഗുരുതരാവസ്ഥയിൽ നിന്ന് ‘വളരെ മോശം’ വിഭാഗത്തിൽ താഴ്ന്നത്. സിസ്റ്റം ഓഫ് എയർ ക്വാളിറ്റി ആൻഡ് വെതർ ഫോർകാസ്റ്റിംഗ് ആൻഡ് റിസർച്ച് പ്രകാരം ശനിയാഴ്ച രാവിലെ 6 മണിക്ക് രേഖപ്പെടുത്തിയ ശരാശരി AQI 398 ആണ്.

സെൻട്രൽ പൊല്യൂഷൻ കൺട്രോൾ ബോർഡ് (സിപിസിബി) രാവിലെ 6 മണിക്ക് രേഖപ്പെടുത്തിയ കണക്കുകൾ പ്രകാരം ആർകെ പുരത്ത് 396, ന്യൂ മോട്ടി ബാഗിൽ 350, ഐജിഐ എയർപോർട്ട് ഏരിയയിൽ 465, നെഹ്‌റു നഗറിൽ 416 എന്നിങ്ങനെയാണ് വായുവിന്റെ ഗുണനിലവാരം രേഖപ്പെടുത്തിയിരിക്കുന്നത്.

വെള്ളിയാഴ്ച വൈകുന്നേരം നാലു മണിക്ക് രേഖപ്പെടുത്തിയ ഡൽഹിയിലെ 24 മണിക്കൂർ ശരാശരി AQI 405 ആയിരുന്നു. വ്യാഴാഴ്ച 419, ബുധനാഴ്ച 401, ചൊവ്വാഴ്ച 397, തിങ്കളാഴ്ച 358, ഞായറാഴ്ച 218 എന്നിങ്ങനെയാണ് കണക്കുകൾ.

പൂജ്യത്തിനും 50 നും ഇടയിലുള്ള എക്യുഐ നല്ലത്, 51, 100 തൃപ്‌തികരം, 101-ഉം 200 മിതമായത്, 201-ഉം 300-ഉം ‘കുഴപ്പമില്ലത്തത്, 301-ഉം 400-ഉം വളരെ മോശം, 401-ഉം 450-ഉം അതിനുമുകളിലും വരുന്നത് പ്ലസ് വിഭാഗം അഥവാ ഗുരുതര വിഭാഗം എന്നിങ്ങനെയാണ് എക്യുഐ. 

അതേസമയം, രാജ്യതലസ്ഥാനത്ത് താപനില കുറയാൻ തുടങ്ങി, വെള്ളിയാഴ്ച 12 ഡിഗ്രി സെൽഷ്യസാണ് രേഖപ്പെടുത്തിയത്. വ്യാഴാഴ്ച ഡൽഹിയിലുണ്ടായ വായു മലിനീകരണത്തിന് കാരണം വാഹനത്തിൽ നിന്നുള്ള പുറന്തള്ളൽ ആണെന്നാണ് റിപ്പോർട്ട്. ഇത് മൊത്തം മലിനീകരണത്തിന്റെ 25 ശതമാനം വരുമെന്നും ഡൽഹി സർക്കാരും ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജി കാൺപൂരും നൽകിയ കണക്കുകൾ പറയുന്നു. 

പരിസ്ഥിതി മന്ത്രി ഗോപാൽ റായിയുടെ നിർദേശപ്രകാരം ഡൽഹി സർക്കാർ വ്യാഴാഴ്ച പ്രത്യേക ദൗത്യസേന രൂപീകരിച്ചു. നിയന്ത്രണങ്ങൾ നടപ്പിലാക്കുക, നിരീക്ഷണ ശ്രമങ്ങൾ സുഗമമാക്കുക, വഷളായിക്കൊണ്ടിരിക്കുന്ന എക്യുഐയെ അഭിസംബോധന ചെയ്യുന്നതിനുള്ള റിപ്പോർട്ടുകൾ സമാഹരിക്കുക എന്നിവയാണ് ഈ ആറംഗ സംഘത്തിന്റെ ചുമതല. ഡൽഹിയിൽ സ്ഥാപിച്ചിട്ടുള്ള പരീക്ഷണാത്മക സ്മോഗ് ടവറുകൾക്ക് നഗരത്തിലെ അന്തരീക്ഷ മലിനീകരണം കുറയ്ക്കാൻ കഴിഞ്ഞിട്ടില്ലെന്ന് ഡൽഹി മലിനീകരണ നിയന്ത്രണ സമിതി (ഡിപിസിസി) ദേശീയ ഹരിത ട്രൈബ്യൂണലിനെ (എൻജിടി) അറിയിച്ചു. 

ഡൽഹി സർക്കാർ ഗ്രേഡഡ് റെസ്‌പോൺസ് ആക്ഷൻ പ്ലാൻ (​ഗ്രാപ്പ്) സ്റ്റേജ് 4 നടപ്പിലാക്കിയെങ്കിലും ദീപാവലിക്ക് ശേഷം ഡൽഹിയിലെ വായുവിന്റെ ഗുണനിലവാരം മോശമായ അവസ്ഥയിലേക്ക് മാറിയിരുന്നു. കഴിഞ്ഞ ബുധനാഴ്ച തലസ്ഥാനത്ത് ഉണ്ടായ അന്തരീക്ഷ മലിനീകരണത്തിന്റെ 23 ശതമാനത്തിനും കാരണം വൈക്കോൽ കത്തിക്കലാണെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജി പറയുന്നു.