അഹാന കൃഷ്ണ പ്രധാന വേഷത്തിലെത്തുന്ന ‘മി മൈസെൽഫ് ആൻഡ് ഐ ‘ ഫാന്റസി ടൈം ട്രാവൽ വെബ് സീരീസ് ഒടിടി പ്ലാറ്റ്‌ഫോമായ ഐസ്ട്രീമിൽ റിലീസ് ചെയ്‌തു. കഫേ ഉടമയായ മാളവിക എന്ന കഥാപാത്രത്തെയാണ് അഹാന വെബ് സീരീസിൽ അവതരിപ്പിക്കുന്നത്. ടൈം ട്രാവലാണ് സീരീസിന്റെ പ്രധാന പ്രമേയം. ഒരു ടോക്സിക് റിലേഷൻഷിപ്പും അത് മാറ്റാൻ വേണ്ടി ഒരാളുടെ ഭാവിയും ഭൂതവും വർത്തമാന കാലവും ഒരുമിച്ച് അവരുടെ കഫെയിൽ എത്തുന്നതുമാണ് വെബ്‌സീരീസിന്റെ കഥ. പ്രധാനമായും ഇവരുടെ ജീവിതത്തെ മാറ്റിമറിക്കുന്ന സംഭവ വികാസങ്ങളാണ് കഥയുടെ ഇതിവൃത്തം.

സീരീസിൽ മാ കഫേ എന്ന കഫേ നടത്തുന്ന മാളു എന്ന കഥാപാത്രമായി ആണ് അഹാന കൃഷ്ണ എത്തുന്നത്. ഇതാണ് വർത്തമാന കാലം. ഈ കാലത്തിലാണ് കഥ നടക്കുന്നത്. ഈ കഫേയിലേക്ക് മാളൂട്ടി എന്ന ഭൂതവും, മാളവിക എന്ന ഭാവിയും എത്തുകയാണ്. ഇടയ്ക്ക് മാൾസ് എന്ന കഥാപാത്രമായി അഹാന കൃഷ്ണ തന്നെയും ഇവരെ സഹായിക്കാൻ എത്തുന്നുണ്ട്.  ഈ സീരീസിന്റെ പ്രധാന പശ്ചാത്തലവും ഈ കഫേ തന്നെയാണ്.  

അഹാന കൃഷ്ണയെ കൂടാതെ മീരാ നായർ, കാർത്തി വി എസ്, അനൂപ് മോഹൻദാസ്, അരുൺ പ്രദീപ്, രാഹുൽ രാജഗോപാൽ, പ്രദീപ് ജോസഫ് തുടങ്ങിയവരും വെബ് സീരിസിൽ അഭിനയിക്കുന്നു. അഭിലാഷ് സുധീഷ് സംവിധാനം ചെയ്യുന്ന ചിത്രത്തിന്റെ കഥ എഴുതിയിരിക്കുന്നത് അഭിലാഷ് സുധീഷും അഭിജിത്ത് സൈന്തവും ചേർന്നാണ്. നിമിഷ് രവി ക്യാമറയും അതുൽ കൃഷ്ണൻ എഡിറ്റിംഗും ധീരജ് സുകുമാരൻ സംഗീതവും നിർവ്വഹിച്ചിരിക്കുന്നു.