ടെൽ അവീവ്: യുദ്ധം മുറുകുന്നതിനിടെ ആയിരക്കണക്കിന് പലസ്തീനുകാർ അഭയം പ്രാപിച്ച ഗാസയിലെ അൽ ഷീഫ ആശുപത്രിയിൽ നിന്നും വൻ ആയുധ ശേഖരം കണ്ടെത്തിയതായി ഇസ്രായേൽ. നേരത്തെ ഗാസയിലെ ഏറ്റവും ആശുപത്രി ഇസ്രായേലി സൈന്യം പിടിച്ചെടുത്തതിൽ വലിയ വിമർശനം ഉയർന്നിരുന്നു. വൈദ്യുതി ഇല്ലാത്തതിനാൽ അടിസ്ഥാന ഉപകരണങ്ങളുടെ വരെ പ്രവർത്തനം നിലച്ചിരിക്കുന്ന ആശുപത്രിയിൽ നൂറുകണക്കിന് രോഗികളും കുട്ടികളും ആരോഗ്യപ്രവർത്തകരും കുടുങ്ങിക്കിടക്കുകയാണ്. മൂന്ന് കുട്ടികൾ വൈദ്യസഹായം ലഭിക്കാതെ മരിച്ചതായി അധികൃതർ അറിയിച്ചു.

ആശുപത്രി കോമ്പൗണ്ടിനുള്ളിൽ ഇസ്രായേലി ടാങ്കുകൾ ഉണ്ടായിരുന്നു. സൈനികർ തീവ്രപരിചരണ വിഭാഗങ്ങൾ ഉള്ള എമർജൻസി, സർജറി വിഭാഗങ്ങൾ ഉൾപ്പെടെയുള്ള കെട്ടിടങ്ങളിൽ പ്രവേശിച്ചിരുന്നതായി റിപ്പോർട്ടുണ്ട്. ആശുപത്രികളും സ്കൂളുകളും ഹമാസ് ഭീകരർ ആയുധ കേന്ദ്രങ്ങളാക്കി മാറ്റിയെന്നാണ് നേരത്തെ ആരോപണം ഉന്നയിച്ചിരുന്നു. അതിനിടെയാണ് ആശുപത്രിയിലെ ദൃശ്യങ്ങൾ ഇസ്രായേൽ പുറത്തുവിട്ടത്. ആയുധങ്ങൾക്ക് പുറമെ, ഹമാസിന്റെ വാർത്താവിനിമയ സംവിധാനങ്ങളും പിടിച്ചെടുത്തിട്ടുണ്ട്.

നേരത്തെ ആയുധങ്ങൾ പിടിച്ചെടുത്തുവെന്ന് ഇസ്രായേൽ സൈന്യം അവകാശപ്പെട്ടെങ്കിലും തെളിവായി ദൃശ്യങ്ങളൊന്നും നൽകിയിരുന്നില്ല. ആശുപത്രിക്കുള്ളി. പ്രവേശിച്ച ഇസ്രായേൽ സേന രോഗികളേയും ആശുപത്രി ജീവനക്കാരേയും ചോദ്യം ചെയ്തു വരികയാണ്. ആശുപത്രിക്കുള്ളിൽ ഒളിവിൽക്കഴിയുന്ന ഹമാസ് സേനാംഘങ്ങളോട് കീഴടങ്ങാനും ഇസ്രായേൽ ആവശ്യപ്പെട്ടിട്ടുണ്ട്.

ഖത്തർ ഇടപെട്ട് ഇരുരാജ്യങ്ങൾക്കിടയിൽ മഞ്ഞുരുകാനുള്ള ശ്രമങ്ങൾ തുടരുകയാണ്. 50 ബന്ദികളെ വിട്ടയക്കാനും മൂന്ന് ദിവസത്തെ വെടിനിർത്തലിനുമാണ് ശ്രമങ്ങൾ നടത്തുന്നതെന്നാണ് റോയിറ്റേഴ്സ് റിപ്പോർട്ട് ചെയ്യുന്നത്. വെടിനിർത്തൽ നിർത്തിവച്ചാണ് ബന്ദികളിലെ 70 സ്ത്രീകളേയും കുട്ടികളേയും വിട്ടയക്കാമെന്നാണ് ഹമാസ് ഇപ്പോൾ അറിയിച്ചിരിക്കുന്നത്. ചർച്ചകൾ പുരോഗമിക്കുകയാണെന്നും ധാരണയായിട്ടില്ലെന്ന് വാർത്താ ഏജൻസികൾ റിപ്പോർട്ട് ചെയ്യുന്നത്.

ആശുപത്രിക്ക് നേരെയുണ്ടായ ഇസ്രായേൽ നീക്കത്തെ വിമർശിച്ച് യുഎൻ രംഗത്തുവന്നിരുന്നു. രോഗികളുടേയും ആരോഗ്യപ്രവർത്തകരുടേയും സുരക്ഷയിൽ ആശങ്കയുണ്ടെന്ന് ലോകാരോഗ്യ സംഘടനയുടെ തലവൻ ടെഡ്രോസ് അഡാനം പറഞ്ഞു. ആശുപത്രികൾ യുദ്ധക്കളമല്ലെന്നും ഇസ്രായേൽ നടപടി തന്നെ ഞെട്ടിച്ചുവെന്നും യുഎൻ ജീവകാരുണ്യവിഭാഗം മേധാവി മാർട്ടിൻ ഗ്രിഫിത്ത് പറഞ്ഞു.