ബിജെപി നേതാവും കേന്ദ്രമന്ത്രിയുമായ ജ്യോതിരാദിത്യ സിന്ധ്യക്കെതിരെ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി നടത്തിയ പരാമർശത്തിൽ രൂക്ഷ വിമർശനവുമായി മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ. അസഭ്യവും അസഹനീയവുമായ ഇത്തരം പരാമർശങ്ങളും ധിക്കാരപരമായ വാക്കുകളും മധ്യപ്രദേശും രാജ്യവും ഒരിക്കലും പൊറുക്കില്ലെന്നാണ്  മുഖ്യമന്ത്രി ശിവരാജ് സിങ് ചൗഹാൻ പറഞ്ഞു. എക്സിലാണ് അദ്ദേഹം ഇക്കാര്യം പറഞ്ഞത്. 

നവംബർ 15ന് മധ്യപ്രദേശ് തിരഞ്ഞെടുപ്പ് പ്രചാരണത്തിന്റെ അവസാന ദിവസമാണ് പ്രിയങ്ക ​ഗാന്ധി വിവാദ പരാമർശം നടത്തിയത്. ‘‘ഉയരം അൽപം കുറവാണെങ്കിലും അഹങ്കാരത്തിന് ഒരു കുറവും ഇല്ല. ജ്യോതിരാദിത്യ സിന്ധ്യ കോൺഗ്രസിലായിരുന്നപ്പോൾ ഏതു പ്രവർ‌ത്തകനും അദ്ദേഹത്തെ കാണാൻ ചെന്നാൽ മഹാരാജാ എന്ന് വിളിക്കണം. അല്ലെങ്കിൽ അവരുടെ പ്രശ്നങ്ങൾ പരിഹരിക്കപ്പെടില്ല‘‘ എന്നായിരുന്നു പ്രിയങ്ക ​ഗാന്ധി പറഞ്ഞത്. അതിനിടെ, പ്രിയങ്കാ ഗാന്ധിയുടെ പരാമർശം അഹങ്കാരത്തിന്റെ പാരമ്യത്തെയാണ് പ്രതിഫലിപ്പിക്കുന്നതെന്ന് ബിജെപി നേതാവ് ശിവരാജ് സിംഗ് ചൗഹാൻ പറഞ്ഞു. അവരുടെ വാക്കുകൾ പൊതുവികാരം വ്രണപ്പെടുത്തുക മാത്രമല്ല, ഹൃദയഭേദകമാണെന്നും അദ്ദേഹം കൂട്ടിച്ചേർത്തു.

ചൗഹാൻ പ്രിയങ്ക ഗാന്ധിക്കെതിരെ സാങ്കൽപ്പികവും കെട്ടിച്ചമച്ചതുമായ ആരോപണങ്ങളാണ് ഉന്നയിക്കുന്നതെന്ന് മധ്യപ്രദേശ്  മുഖ്യമന്ത്രിക്ക് മറുപടിയായി മധ്യപ്രദേശ് കോൺഗ്രസ് നേതാവ് കമൽനാഥ് പറഞ്ഞു. സിന്ധ്യയ്ക്ക് കോൺഗ്രസിനോടുള്ള വിശ്വസ്തതയെക്കുറിച്ച് ശിവരാജ് ചൗഹാൻ നേരത്തെ പറഞ്ഞ വാക്കുകളും ഓർമിപ്പിച്ചായിരുന്നു കമൽനാാഥിന്റെ പരാമർശം. രാവണന്റെ സഹോദരൻ ‘വിഭീഷണൻ’ എന്ന് വിശേഷിപ്പിച്ചത് അദ്ദേഹമാണെന്നും പറഞ്ഞു.

“നിങ്ങളുടെ അഭിനയത്തെ പ്രശംസിച്ച പ്രിയങ്ക ജിക്ക് നന്ദി പറയണം, ഡിസംബർ മൂന്നിന് ശേഷം നിങ്ങൾ പുതിയ ജോലി കണ്ടെത്തൂ,” ശിവരാജ് സിംഗ് ചൗഹാനെ രൂക്ഷമായി വിമർശിച്ച് കോൺഗ്രസ് നേതാവ് പറഞ്ഞു. അതേസമയം, മധ്യപ്രദേശിലെ 230 നിയമസഭാമണ്ഡലങ്ങളിലേക്കുള്ള നിയമസഭാ തിരഞ്ഞെടുപ്പ് ഇന്ന്. സംസ്ഥാനത്ത് ബിജെപിയും കോൺഗ്രസും തമ്മിലുള്ള ഇഞ്ചോടിഞ്ച് പോരാട്ടമാണ് ഇന്ന് നടക്കുക. സംസ്ഥാനത്ത് നടപ്പാക്കിയ കേന്ദ്ര-സംസ്ഥാന പദ്ധതികളുടെ വിജയം ഉയർത്തിക്കാട്ടി അധികാരത്തിൽ തിരിച്ചെത്തുമെന്നാണ് ബിജെപിയുടെ പ്രതീക്ഷ. കോൺഗ്രസാകട്ടെ ശിവരാജ് സിങ് ചൗഹാൻ സർക്കാരിനോടുള്ള ഭരണവിരുദ്ധവികാരം തങ്ങൾക്ക് അനുകൂലമാകുമെന്ന വിശ്വാസത്തിലാണ്.

ബുധ്‌നിയിൽ നിന്നുള്ള മുഖ്യമന്ത്രി ശിവരാജ് സിംഗ് ചൗഹാൻ, ഡിമ്‌നിയിൽ നിന്നുള്ള മുൻ കേന്ദ്രമന്ത്രി നരേന്ദ്ര സിംഗ് തോമർ, നർസിംഗ്പൂരിൽ പ്രഹ്ലാദ് സിംഗ് പട്ടേൽ, നിവാസിൽ ഫഗ്ഗൻ സിംഗ് കുലസ്‌തെ, മുൻ മുഖ്യമന്ത്രിയും കോൺഗ്രസ് മുതിർന്ന നേതാവുമായ കമൽനാഥ് ചിന്ദ്വാര എന്നീ പ്രമുഖർ നേരിട്ടാണ് പോരാട്ടം. ബിജെപി ജനറൽ സെക്രട്ടറി കൈലാഷ് വിജയവർഗിയ ഇൻഡോർ-1-ൽ മത്സരിക്കുന്നു. പാർട്ടിയുടെ മൂന്ന് ലോക്‌സഭാ എംപിമാരായ രാകേഷ് സിംഗ്, ഗണേഷ് സിംഗ്, റിതി പഥക് എന്നിവരും മത്സരരംഗത്തുണ്ട്.