ഇന്ത്യയിലും പുറത്തും നിരവധി ആരാധകരുള്ള സൂപ്പർ താരമാണ് പ്രിയങ്ക ചോപ്ര. ബോളിവുഡും കടന്ന് ഹോളിവുഡിൽ എത്തി നിൽക്കുന്ന പ്രിയങ്കയുടെ ഓരോ വിശേഷങ്ങളും ആരാധകർ ഏറെ ആവേശത്തോടെയാണ് സ്വീകരിക്കാറുള്ളത്. ഒരർത്ഥത്തിൽ ഗ്ലോബൽ ഐക്കൺ എന്ന പട്ടം പ്രിയങ്ക ഇതിനോടകം തന്നെ നേടിക്കഴിഞ്ഞു. പ്രിയങ്ക ചോപ്രയും പോപ്പ് താരം നിക്കും തമ്മിൽ നടന്നത് ബോളിവുഡ് ഏറെ ആഘോഷമാക്കിയ താര വിവാഹമായിരുന്നു. 

നിക്ക് ജൊനാസും പ്രിയങ്ക ചോപ്രയും 2018ലായിരുന്നു വിവാഹിതരായത്. ഗായകനും നടനുമായ നിക്ക് ജൊനാസ് ഇന്ത്യക്കാർക്ക് പ്രിയങ്കരനാണ്. നിക്കും സഹോദരന്മാരും ഒന്നിച്ചുള്ള ജൊനാസ് ബ്രദേഴ്സിന്റെ സംഗീത പരിപാടിയ്ക്കും ആരാധകർ ഏറെയാണ്. ഇപ്പോഴിതാ താന്റെ രോഗാവസ്ഥയെ കുറിച്ച് വെളിപ്പെടുത്തി എത്തിയിരിക്കുകയാണ് നിക്ക്. 

താൻ പ്രമേഹ രോഗിയായിട്ട് 18 വർഷങ്ങൾ തികയുകയാണെന്ന് നിക്ക് പറയുന്നു. ടൈപ്പ് 1 പ്രമേഹമാണ് നിക്കിന്. രോഗാവസ്ഥ തിരിച്ചറിഞ്ഞ അന്നു മുതൽ കുടുംബം വലിയ രീതിയിലാണ് തന്നെ കരുതുന്നതെന്നും ഇക്കാര്യത്തിൽ പ്രിയങ്കയുടെ പങ്ക് വളരെ വലുതാണെന്നും നിക്ക് പറയുന്നു. സോഷ്യൽ മീഡിയയിയിൽ പങ്കുവെച്ച വീഡിയോയിലൂടെയാണ് നിക്ക് ഇക്കാര്യങ്ങൾ വ്യക്തമാക്കിയത്. 

‘എന്നിലെ പ്രമേഹത്തെ തിരിച്ചറിഞ്ഞിട്ട് 18 വർഷം തികയുന്നു. എന്റെ അമ്മയാണ് എന്നിലുണ്ടായ ചില മാറ്റങ്ങൾ ശ്രദ്ധിച്ചു തുടങ്ങിയത്. പിന്നീട് ഡോക്ടറെ സമീപിച്ചപ്പോൾ ടൈപ്പ് 1 പ്രമേഹമാണെന്നു സ്ഥിരീകരിച്ചു. അപ്പോൾ ഞാൻ ആകെ തളർന്നു. പക്ഷേ കുടുംബത്തിന്റെയും ചുറ്റുമുള്ളവരുടെയും പിന്തുണ എന്നെ അതിശയിപ്പിച്ചു. ഞാൻ ശരിക്കും ഭാഗ്യവാനാണ്. ഇത്രയേറെ പേരുടെ സ്‌നേഹവും കരുതലും ലഭിച്ചല്ലോ. പ്രിയങ്കയും എന്റെ ആരോഗ്യകാര്യത്തിൽ പ്രത്യേക ശ്രദ്ധ പുലർത്തുന്നുണ്ട്. 

പ്രിയങ്ക ശരിക്കും വിവരണങ്ങൾക്കതീതമാണ്. നിങ്ങൾ ഓരോരുത്തരും നിങ്ങളെപ്പോലെ ചുറ്റുമുള്ളവരെയും പരിഗണിക്കണം. രോഗലക്ഷണങ്ങൾ കണ്ടാൽ ചികിത്സ തേടാൻ വൈകരുത്. ഞാൻ ഇപ്പോൾ ഒരു പിതാവാണ്. എന്റെ മകളുടെ ആരോഗ്യകാര്യം നോക്കേണ്ടത് എത്രമാത്രം പ്രധാനമാണെന്ന് ഞാൻ മനസ്സിലാക്കുന്നു. അവളുടെ കാര്യത്തിൽ ഞാൻ കൂടുതൽ ശ്രദ്ധിക്കേണ്ടിയിരിക്കുന്നു’, നിക് ജൊനാസ് ഇൻസ്റ്റഗ്രാമിൽ കുറിച്ചു.