ലഖ്നൗ: വീട്ടിനുള്ളിൽവെച്ച് പീഡിപ്പിക്കാൻ ശ്രമിച്ച 23കാരന്‍റെ ജനനേന്ദ്രിയം മുറിച്ച യുവതി കസ്റ്റഡിയിൽ. ഉത്തര്‍പ്രദേശിലെ കൗശാംബി ജില്ലയില്‍ കഴിഞ്ഞദിവസമാണ് സംഭവം. കത്തി ഉപയോഗിച്ച് യുവാവിന്‍റെ ജനനേന്ദ്രിയം മുറിച്ചുമാറ്റിയ യുവതി പിന്നീട് പോലീസ് സ്റ്റേഷനിലെത്തി വിവരം അറിയിക്കുകയായിരുന്നെന്ന് പോലീസ് പറഞ്ഞു.

വീട്ടിലെ ജോലിക്കാരനാണ് മറ്റ് കുടുംബാംഗങ്ങള്‍ ഇല്ലാതിരുന്ന സമയത്ത് തന്നെ പീഡിപ്പിക്കാന്‍ ശ്രമിച്ചതെന്നാണ് യുവതി പോലീസിന് നൽകിയ മൊഴി. ഇവരുടെ ഭർത്താവ് ഗൾഫിൽ ഡ്രൈവറായി ജോലി ചെയ്യുകയാണ്. ബുധനാഴ്ച യുവതിയുടെ വീട്ടിൽ മറ്റാരും ഉണ്ടായിരുന്നില്ല. ഈ അവസരം മുതലെടുത്താണ് 23കാരൻ പീഡിപ്പിക്കാൻ ശ്രമിച്ചതെന്നാണ് പരാതി. രക്ഷപ്പെട്ട യുവതി അല്‍പസമയത്തിനുള്ളില്‍ കത്തിയുമായി തിരികെ എത്തി യുവാവിന്റെ ജനനേന്ദ്രിയം മുറിച്ചു മാറ്റുകയായിരുന്നു.

പിന്നാലെ പോലീസ് സ്റ്റേഷനിലെത്തി വിവരം അറിയിക്കുകയും യുവാവിനെതിരെ പരാതി നൽകുകയും ചെയ്തു. വീട്ടിലെത്തിയ പോലീസ് ആണ് രക്തത്തില്‍ കുളിച്ചു കിടക്കുന്ന യുവാവിനെ കണ്ടെത്തിയത്. കത്തിയും ഇവിടെ നിന്ന് കണ്ടെത്തിയിരുന്നു. അവശനിലയിലായിരുന്ന യുവാവിനെ ഉടന്‍ തന്നെ പോലീസ് വാഹനത്തില്‍ സമീപത്തെ ആശുപത്രിയില്‍ എത്തിച്ചു. എന്നാല്‍ ആരോഗ്യനില അതീവഗുരുതരമായതോടെ വിദഗ്ദ ചികിത്സയ്ക്കായി പ്രയാഗ് രാജിലെ ആശുപത്രിയിലേക്ക് കൊണ്ടുപോയി.

അതേസമയം, സംഭവത്തില്‍ വ്യത്യസ്ത മൊഴിയാണ് യുവാവ് നല്‍കിയതെന്നാണ് പോലീസ് പറയുന്നത്. കുട്ടിക്കാലം മുതല്‍ പരാതിക്കാരിയുടെ വീട്ടിലെ ജോലിക്കാരനാണ് താന്‍. സംഭവദിവസം അവര്‍ വീട്ടിലേക്ക് വിളിച്ചുവരുത്തി തന്നെ അബോധാവസ്ഥയിലാക്കിയ ശേഷം സ്വകാര്യഭാഗം മുറിക്കുകയായിരുന്നുവെന്നാണ് യുവാവ് പറയുന്നതെന്നും പോലീസ് പറഞ്ഞു.

യുവാവിന്‍റെ പിതാവ് നല്‍കിയ പരാതിയുടെ അടിസ്ഥാനത്തിലാണ് യുവതിക്കെതിരെ കേസെടുത്തത്. ഐപിസി 326, 308 വകുപ്പുകള്‍ പ്രകാരമാണ് യുവതിക്കെതിരെ കേസെടുത്തിരിക്കുന്നതെന്ന് പോലീസ് അറിയിച്ചു.