പ്രശസ്ത കൂത്ത്, കൂടിയാട്ടം ആചാര്യൻ പി കെ നാരായണൻ നമ്പ്യാർ അന്തരിച്ചു. 96 വയസ്സായിരുന്നു. പാലക്കാട്ടെ സ്വകാര്യ ആശുപത്രിയിൽ ബുധനാഴ്‌ചയായിരുന്നു അന്ത്യം. 2008ൽ രാജ്യം പത്മശ്രീ നൽകി അദ്ദേഹത്തെ ആദരിച്ചു.

നാട്യാചാര്യനായ കൂടിയാട്ടം കലാകാരൻ പത്മശ്രീ മാണിമാധവ ചാക്യാരുടെയും കുഞ്ഞിമാളു നങ്ങ്യാരമ്മയുടെയും (ശ്രീദേവി നങ്ങ്യാരമ്മ) മൂത്ത മകനാണ്. ദീർഘകാലം കേരള കലാമണ്ഡലത്തിൽ കൂടിയാട്ടം വിഭാഗത്തിൽ അധ്യാപകനായിരുന്നു. കേരള കലാമണ്ഡലത്തിൽ ഡീൻ ആയും സേവനമനുഷ്ഠിച്ചു.

മിഴാവിൽ തായമ്പക, മിഴാവ് മേളം തുടങ്ങിയ ആവിഷ്കാരങ്ങൾ നടത്തിയിട്ടുണ്ട്. നിരവധി സംസ്കൃത നാടകങ്ങൾ എഴുതി. മന്ത്രാങ്കം, ശ്രീകൃഷ്ണചരിതം നങ്ങ്യാർക്കൂത്ത് തുടങ്ങിയ നിരവധി ഗ്രന്ഥങ്ങളുടെ രചയിതാവാണ്. സംസ്കാരം ഇന്ന് ഉച്ചക്ക് രണ്ടിന് വീട്ടുവളപ്പിൽ നടക്കും.

1927 മേയ് 26നാണ് ജനനം. 11-ാം വയസ്സിൽ കൂടിയാട്ടത്തിൽ മിഴാവ് കലാകാരനായി അരങ്ങേറി. ചാക്യാരല്ലാത്തയാൾ വേഷംകെട്ടാൻ പാടില്ല എന്ന നിബന്ധന തെറ്റിച്ച് 1952-ൽ കുഞ്ചൻസ്മാരക വായനശാലയിൽ നടന്ന സമ്മേളനപരിപാടിയിൽ ആദ്യമായി നടനായി അരങ്ങിലെത്തി.