സംസ്ഥാനത്ത് ഏറെ വാർത്താ പ്രാധാന്യം നേടിയ സംഭവമായിരുന്നു നടനും ബിജെപി നേതാവുമായ (BJP Leader) സുരേഷ് ഗോപി മാധ്യമപ്രവർത്തകയോട് ആപമര്യാദയായി പെരുമാറിയെന്ന വിഷയം. പ്രസ്തുത വിഷയത്തിൽ കഴിഞ്ഞദിവസം സുരേഷ് ഗോപിയെ നടക്കാവ് പൊലീസ് സ്റ്റേഷനിൽ ചോദ്യം ചെയ്യലിന് വിളിപ്പിച്ചിരുന്നു. ബിജെപി നേതാക്കളുടെയും പ്രവർത്തകരുടെയും അകമ്പടിയോടെയാണ് സുരേഷ് ഗോപി (Suresh Gopi) ചോദ്യം ചെയ്യലിന് ഹാജരായത്. ഇപ്പോഴിതാ സുരേഷ് ഗോപിക്കെതിരായ പരാതിയില്‍ കഴമ്പില്ല എന്ന വിലയിരുത്തലിലാണ് പൊലീസ് (Kerala Police) എന്ന റിപ്പോർട്ടുകളാണ് പുറത്തുവരുന്നത്. മാധ്യമപ്രവര്‍ത്തകയോട് അപമര്യാദയായി പെരുമാറിയെന്ന കേസില്‍ സുരേഷ് ഗോപിക്ക് ഇനി നോട്ടീസ് അയക്കേണ്ടതില്ലെന്നും പൊലീസ് തീരുമാനിച്ചതായാണ് വിവരം. 

ലൈംഗികാതിക്രമം സംബന്ധിച്ച് 354 എ വകുപ്പ് പ്രകാരമുള്ള കുറ്റം സുരേഷ് ഗോപി പ്രഥമദൃഷ്ട്യാ ചെയ്തിട്ടില്ലെന്നാണ് പൊലീസ് കണ്ടെത്തിയിരിക്കുന്നതെന്നാണ് സൂചനകൾ. ഈ കേസില്‍ ബുധനാഴ്ച പൊലീസ് കോടതിയില്‍ കുറ്റപത്രം സമര്‍പ്പിക്കുമെന്നാണ് റിപ്പോർട്ടുകൾ. കഴിഞ്ഞ ദിവസം ഈ കേസിൽ സുരേഷ് ഗോപിയെ നടക്കാവ് പൊലീസ് ചോദ്യം ചെയ്ത് വിട്ടയച്ചിരുന്നു. അന്വേഷണ ഉദ്യോഗസ്ഥര്‍ ആവശ്യപ്പെടുമ്പോള്‍ ഹാജരാകണമെന്ന് നിര്‍ദേശിച്ചാണ് സുരേഷ് ഗോപിയെ വിട്ടയച്ചത്. ഏകദേശം രണ്ടുമണിക്കൂറിലേറെ ചോദ്യം ചെയ്യൽ നീണ്ടുനിന്നു 

സുരേഷ് ഗോപി മാധ്യമപ്രവർത്തകയോട് മര്യാതയായി പെരുമാറി എന്ന സംഭവം ഏറെ കോളിളക്കം സൃഷ്ടിച്ചിരുന്നു. മാധ്യമപ്രവര്‍ത്തകയുടെ പരാതിയില്‍ സുരേഷ് ഗോപിക്കെതിരെ 354 എ (ലൈംഗികാതിക്രമം) എന്ന വകുപ്പ് ചുമത്തിയാണ് പൊലീസ് കേസെടുത്തിരുന്നത്. എന്നാൽ വീഡിയോ ദൃശ്യങ്ങൾ പരിശോധിച്ചതിൽ നിന്നും സുരേഷ് ഗോപി ഒരു പ്രവർത്തകയെ ലൈംഗികമായി അധിക്ഷേപിക്കുന്ന രീതിയിലുള്ള കുറ്റം ചെയ്തിട്ടില്ല എന്നാണ് പൊലീസ് വിലയിരുത്തിയത്. ഇതും പ്രകാരമുള്ള റിപ്പോർട്ട് പൊലീസ് ബുധനാഴ്ച കോടതിയിൽ സമർപ്പിക്കാനാണ് നീക്കം. ഇതുമായി ബന്ധപ്പെട്ട മറ്റു കാര്യങ്ങൾ പൊലീസ് കോടതിയെ നേരിട്ട് ബോധ്യപ്പെടുത്താനാണ് ലക്ഷ്യമിടുന്നത്. 

ഒക്ടോബര്‍ 27നാണ് കേസിനാസ്പദമായ സംഭവം നടന്നത്. മാധ്യമപ്രവർത്തകരോട് സംസാരിക്കുന്നതിനിടെ സുരേഷ് ഗോപി തന്നോട് അപമര്യാതയായി പെരുമാറി എന്നാണ് മാധ്യമപ്രവർത്തക പരാതി ഉന്നയിച്ചത്. മാധ്യമപ്രവർത്തകരുടെ പരാതിയിൽ പൊലീസ് കേസും എടുത്തിരുന്നു. സുരേഷ് ഗോപി സ്ത്രീത്വത്തെ അപമാനിച്ചെന്നും മോശം ഉദ്ദേശത്തോടെ തന്നോട് പെരുമാറിയെന്നും ചൂണ്ടിക്കാട്ടിയാണ് മാധ്യമപ്രവർത്തക പരാതി നൽകിയത്. സംഭവം വിവാദമായതിന് പിന്നാലെ സുരേഷ് ഗോപി മാധ്യമപ്രവർത്തകയോട് മാപ്പുപറഞ്ഞ് രംഗത്തെത്തുകയായിരുന്നു. എന്നാൽ അവർ പരാതി പിൻവലിച്ചില്ല. പ്രസ്തുത പരാതിയിൽ സ്ത്രീയോട് ലൈംഗിക ഉദ്ദേശത്തോടെ പെരുമാറിയെന്ന കുറ്റത്തിന് ഐപിസി 354 എ വകുപ്പ് പ്രകാരം നടക്കാവ് പൊലീസ് കേസ് എടുക്കുകയായിരുന്നു. കേസ് എടുത്തതിന് പിന്നാലെയാണ് കഴിഞ്ഞദിവസം സുരേഷ് ഗോപിയെ ചോദ്യം ചെയ്യലിനായി സ്റ്റേഷനിലേക്ക് വിളിപ്പിച്ചത്.