ഖാലിസ്ഥാനി നേതാവ് ഹർദീപ് സിംഗ് നിജ്ജാറിന്റെ കൊലപാതകവുമായി ബന്ധപ്പെട്ട് ഇന്ത്യയുടെ പങ്കിനെക്കുറിച്ചുള്ള തെളിവ് നൽകാൻ കാനഡയോട് ആവശ്യപ്പെട്ടിട്ടുണ്ടെന്ന് വിദേശകാര്യ മന്ത്രി എസ് ജയശങ്കർ. ഇതുമായി ബന്ധപ്പെട്ട കേസിലെ അന്വേഷണം ഇന്ത്യ തള്ളിക്കളയുന്നില്ലെന്നും മാധ്യമപ്രവർത്തകരോട് സംസാരിക്കവെ ജയശങ്കർ പറഞ്ഞു.

“ഞങ്ങൾ കനേഡിയരോട് പറഞ്ഞിട്ടുണ്ട്. അക്രമാസക്തമായ മാർഗങ്ങളിലൂടെ ഉൾപ്പെടെ ഇന്ത്യയിൽ നിന്നുള്ള വിഘടനവാദത്തെ വാദിക്കുന്ന അക്രമപരവും തീവ്രവുമായ രാഷ്ട്രീയ അഭിപ്രായങ്ങൾക്ക് കനേഡിയൻ രാഷ്ട്രീയം ഇടം നൽകിയതായി ഞങ്ങൾക്ക് തോന്നുന്നു. അവർക്ക് അവരുടെ കാഴ്ചപ്പാടുകൾ പ്രകടിപ്പിക്കാനുള്ള സ്വാതന്ത്ര്യം  കനേഡിയൻ രാഷ്ട്രീയത്തിലുണ്ട്, ” ജയശങ്കർ കൂട്ടിച്ചേർത്തു.

“എന്റെ രാജ്യത്തെ ഹൈക്കമ്മീഷണർ ഉൾപ്പെടെയുള്ള നയതന്ത്രജ്ഞർ ആക്രമിക്കപ്പെടുകയും ഹൈക്കമ്മീഷനും കോൺസുലേറ്റ് ജനറലിനും നേരെ ബോംബ് എറിയുകയും ചെയ്തു. ഇതിനെതിരെ ഒരു നടപടിയും സ്വീകരിച്ചില്ല. സംസാര സ്വാതന്ത്ര്യത്തിനും അഭിപ്രായ സ്വാതന്ത്ര്യത്തിനും ഒരു നിശ്ചിത ഉത്തരവാദിത്തമുണ്ട്. ആ സ്വാതന്ത്ര്യം ദുരുപയോഗം ചെയ്യുന്നതും രാഷ്ട്രീയ ആവശ്യങ്ങൾക്കായി ദുരുപയോഗം ചെയ്യുന്നതിലുള്ള സഹിഷ്ണുതയും വളരെ തെറ്റാണ്“ ജയശങ്കർ വ്യക്തമാക്കി. 

ഇന്ത്യയ്ക്കെതിരെ അത്തരമൊരു ആരോപണം ഉന്നയിക്കാൻ എന്തെങ്കിലും കാരണമുണ്ടെങ്കിൽ, അതുമായി ബന്ധപ്പെട്ട് തെളിവുകൾ പങ്കിടണമെന്നും ജയശങ്കർ പറഞ്ഞു. സെപ്തംബർ 18 ന് ആണ് ഇന്ത്യ-കാനഡ ബന്ധം വഷളാക്കിയ പ്രധാനമന്ത്രി ജസ്റ്റിൻ ട്രൂഡോയുടെ ആരോപണം പുറത്തുവന്നത്. ഇന്ത്യൻ സർക്കാർ ഏജന്റുമാരും നിജ്ജാറിന്റെ മരണവും തമ്മിൽ ബന്ധമുണ്ടെന്ന ചില വിശ്വസനീയമായ ആരോപണങ്ങൾ കനേഡിയൻ സുരക്ഷാ ഏജൻസികൾ സജീവമായി അന്വേഷിക്കുകയാണെന്നായിരുന്നു ട്രൂഡോയുടെ പ്രസ്താവന. എന്നാൽ ഈ ആരോപണങ്ങളെ അസംബന്ധം എന്നാണ് ഇന്ത്യ വിശേഷിപ്പിച്ചത്. 

കനേഡിയൻ പ്രവിശ്യയായ ബ്രിട്ടീഷ് കൊളംബിയയിലെ സറേയിലെ ഒരു ഗുരുദ്വാരയ്ക്ക് പുറത്ത് വച്ചാണ് രണ്ട് അജ്ഞാതരായ അക്രമികൾ നിജ്ജാറിനെ വെടിവെച്ചു കൊന്നത്. ആരോപണത്തിന് പിന്നാലെ കാനഡ ഒരു ഇന്ത്യൻ നയതന്ത്ര ഉദ്യോഗസ്ഥനെ പുറത്താക്കി. ഇതോടെ കനേഡിയൻ പൗരന്മാർക്കുള്ള വിസ സേവനങ്ങൾ ഇന്ത്യ താൽക്കാലികമായി നിർത്തിവയ്ക്കുകയും ഒരു കനേഡിയൻ നയതന്ത്രജ്ഞനെ പുറത്താക്കുകയും ചെയ്തിരുന്നു.

തുടർന്ന് രാജ്യത്തെ നയതന്ത്ര സാന്നിധ്യം കുറയ്ക്കാൻ കാനഡയോട് ഇന്ത്യ ആവശ്യപ്പെട്ടു. ഏകപക്ഷീയമായി പദവി റദ്ദാക്കുമെന്ന ഇന്ത്യയുടെ ഭീഷണിയെ തുടർന്ന് 41 നയതന്ത്ര ഉദ്യോഗസ്ഥരെ കാനഡ പിൻവലിച്ചു. നയതന്ത്രജ്ഞർ പോയില്ലെങ്കിൽ വെള്ളിയാഴ്ചയോടെ അവരുടെ ഔദ്യോഗിക പദവി റദ്ദാക്കുമെന്ന് ഇന്ത്യ ഭീഷണിപ്പെടുത്തിയതായി കനേഡിയൻ വിദേശകാര്യ മന്ത്രി മെലാനി ജോളി പറഞ്ഞു. ഈ നീക്കം യുക്തിരഹിതവും നയതന്ത്ര ബന്ധങ്ങളെക്കുറിച്ചുള്ള വിയന്ന കൺവെൻഷന്റെ ലംഘനവുമാണെന്നും അവർ ആരോപിച്ചു.