കാനഡയിലെ ബ്രാംപ്ടണിൽ ദീപാവലി ആഘോഷത്തിനിടെ ഖാലിസ്ഥാൻ അനുകൂലികളും ഹിന്ദുക്കളും തമ്മിൽ ഏറ്റുമുട്ടുന്നതിന്റെ വീഡിയോ പുറത്ത്. ഏറ്റുമുട്ടുൽ വീഡിയോ സമൂഹ മാധ്യമങ്ങളിൽ വ്യാപകമായി പ്രചരിച്ചിട്ടുണ്ട്.  ‌ഖാലിസ്ഥാൻ പതാകകൾ വഹിച്ചുകൊണ്ട് ഒരു കൂട്ടം ആളുകൾ നിലത്തുകിടക്കുന്ന വസ്തുക്കളെടുത്ത് ദീപാവലി ആഘോഷിക്കുന്ന ഹിന്ദു ജനക്കൂട്ടത്തിന് നേരെ എറിയുന്നതായി ടൊറന്റോ സൺ റിപ്പോർട്ട് ചെയ്യുന്നു. 

മാൾട്ടണിലെ വെസ്റ്റ് വുഡ് മാളിലാണ് സംഭവം നടന്നതെന്ന് എക്‌സിൽ വീഡിയോ പങ്കുവെച്ച സോഷ്യൽ മീഡിയ ഉപയോക്താവ് പറയുന്നു. പോലീസ് എത്തി ആൾക്കൂട്ടത്തോട് പിന്നോട്ട് പോകാൻ ആവശ്യപ്പെടുന്നതായും വീഡിയോയിൽ കാണാം. പീൽ റീജിയണൽ പോലീസ് വിഷയത്തിൽ തുടരന്വേഷണം പ്രഖ്യാപിച്ചതായി ടൊറന്റോ സൺ റിപ്പോർട്ടിൽ പറയുന്നു. 

ആവിഷ്കാര സ്വാതന്ത്ര്യത്തിന്റെ ദുരുപയോഗം തടയുന്നതിനുള്ള ചട്ടക്കൂട് ശക്തിപ്പെടുത്താൻ ഇന്ത്യ കാനഡയോട് ശുപാർശ ചെയ്തതിന് ഒരാഴ്ചയ്ക്ക് ശേഷമാണ് വീഡിയോ പുറത്തുവന്നിരിക്കുന്നത്. കഴിഞ്ഞയാഴ്ച ജനീവയിൽ നടന്ന ഐക്യരാഷ്ട്രസഭയുടെ മനുഷ്യാവകാശ കൗൺസിലിന്റെ (യുഎൻഎച്ച്ആർസി) അവലോകന യോഗത്തെ അഭിസംബോധന ചെയ്യവെയാണ് ഇന്ത്യയുടെ സ്ഥിരം മിഷൻ ഫസ്റ്റ് സെക്രട്ടറി കെ എസ് മുഹമ്മദ് ഹുസൈൻ ശുപാർശകൾ മുന്നോട്ടുവച്ചത്. 

“അക്രമം പ്രോത്സാഹിപ്പിക്കുന്നതിനും തീവ്രവാദത്തെ പ്രോത്സാഹിപ്പിക്കുന്ന ഗ്രൂപ്പുകളുടെ പ്രവർത്തനങ്ങൾ അനുവദിക്കാതിരിക്കുന്നതിനും അഭിപ്രായ സ്വാതന്ത്ര്യം ദുരുപയോഗം ചെയ്യുന്നത് തടയുന്നതിനുള്ള ആഭ്യന്തര ചട്ടക്കൂട് കൂടുതൽ ശക്തിപ്പെടുത്തുക. മതപരവും വംശീയവുമായ ന്യൂനപക്ഷങ്ങളുടെ ആരാധനാലയങ്ങൾക്കെതിരായ ആക്രമണങ്ങൾ തടയുക, വിദ്വേഷ കുറ്റകൃത്യങ്ങളും വിദ്വേഷ പ്രസംഗങ്ങളും പരിഹരിക്കുന്നതിന് നിയമനിർമ്മാണവും മറ്റ് നടപടികളും ശക്തിപ്പെടുത്തുക, ”മുഹമ്മദ് ഹുസൈൻ യുഎൻഎച്ച്ആർസി യോഗത്തിൽ പറഞ്ഞു.

അതിനിടെ ഖാലിസ്ഥാനി ഭീകരൻ ഹർദീപ് സിംഗ് നിജ്ജാറിനെ കൊലപ്പെടുത്തിയ സംഭവത്തിൽ ഇന്ത്യയുടെ പങ്ക് ആവർത്തിച്ച് കനേഡിയൻ പ്രധാനമന്ത്രി ജസ്റ്റിൻ ട്രൂഡോ. തന്റെ രാജ്യം നിയമവാഴ്ചയ്‌ക്കായി എപ്പോഴും നിലകൊള്ളുമെന്നും ട്രൂഡോ പറഞ്ഞു. നിജ്ജാറിന്റെ കൊലപാതകത്തെക്കുറിച്ചുള്ള കാര്യങ്ങൾ അന്വേഷിക്കുന്നതിനായി ഇന്ത്യയിലേക്കും യുഎസ് ഉൾപ്പെടെയുള്ള സഖ്യകക്ഷികളിലേക്കും എത്തിയെന്നും ട്രൂഡോ വ്യക്തമാക്കി. 

“നിജ്ജാറിന്റെ കൊലപാതകം ഞങ്ങൾ വളരെ ഗൗരവമായി എടുത്ത കാര്യമാണ്. നിയമപാലകരും അന്വേഷണ ഏജൻസികളും അവരുടെ ജോലി ചെയ്യുന്നത് തുടരുന്നതിനാൽ ഞങ്ങൾ എല്ലാ സഖ്യകക്ഷികളുമായും നല്ലരീതിയിൽ പ്രവർത്തിക്കും. കാനഡ എല്ലായ്പ്പോഴും നിയമവാഴ്ചയ്ക്ക് വേണ്ടി നിലകൊള്ളുന്ന രാജ്യമാണ്. വലിയ രാജ്യങ്ങൾക്ക് അന്താരാഷ്ട്ര നിയമം ലംഘിക്കാൻ കഴിയുമെങ്കിൽ, അത് ലോകത്തെ കൂടുതൽ അപകടത്തിലാക്കും.”- അദ്ദേഹം മാധ്യമപ്രവർത്തകരോട് പറഞ്ഞു.

ഇന്ത്യൻ വംശജനായ പാർലമെന്റേറിയൻ ചന്ദൻ ആര്യ പാർലമെന്റ് ഹില്ലിൽ ഒരു പരിപാടിക്ക് ഹൈക്കമ്മീഷണർ സഞ്ജയ് കുമാർ വർമ്മയെ ക്ഷണിച്ച സംഭവത്തെ കുറിച്ചും അദ്ദേഹം പ്രതികരിച്ചു. 40 ലധികം കനേഡിയൻ നയതന്ത്ര ഉദ്യോഗസ്ഥരെ ഒഴിപ്പിച്ച ഇന്ത്യ, വിയന്ന കൺവെൻഷൻ ലംഘിച്ചുവെന്നും ട്രൂഡോ ആരോപിച്ചു. ഈ നീക്കം നിരാശാജനകമാണെന്നും ട്രൂഡോ പറഞ്ഞു.