ന്യൂയോർക്ക്: നോർത്ത് അമേരിക്ക യൂറോപ്പ് ഭദ്രാസന (2023-2026) യുവജന സഖ്യത്തിന്റെ പ്രവർത്തനോദ്ഘാടനം നോർത്ത് അമേരിക്ക-യൂറോപ്പ് ഭദ്രാസനാധിപൻ ഡോ. ഐസക് മാർ പീലക്സിനോസ് എപ്പിസ്കോപ്പ നിർവഹിച്ചു.
സൂം പ്ലാറ്റ്ഫോമിലൂടെ ചേർന്ന ഉദ്ഘാടന യോഗത്തിൽ റവ. ജോർജ് ഏബ്രഹാം പ്രാരംഭ പ്രാർഥന നടത്തി. ഭദ്രാസന യുവജന സഖ്യം ജനറൽ സെക്രട്ടറി ബിജി ജോബി സ്വാഗതം ആശംസിച്ചു. അലക്സാൻഡർ പാപ്പച്ചൻ ഗാനം ആലപിച്ചു.
സാക്ഷ്യം നഷ്ടപ്പെട്ട സമൂഹമാണ് നിരാശയിലും തകർച്ചയിലും ജീവിതം നയിക്കുന്നത്. മറ്റുള്ളവർക്ക് മാർഗനിർദ്ദേശം നൽകാൻ സാധിക്കാതെ ജീവിതം മാറുമ്പോൾ സാക്ഷ്യം നഷ്ടപ്പെട്ട അവസ്ഥയിലേക്ക് നമ്മുടെ ജീവിതം അധപതിക്കുന്നു. ഓരോ രംഗങ്ങളിലും കർത്താവിന്റെ സാക്ഷികളായി ജീവിക്കാൻ കഴിയുന്നത് എത്രയും ശ്ലാഘനീയമാണെന്നും എപ്പിസ്കോപ്പ തിരുമേനി പറഞ്ഞു. തുടർന്ന് ഭദ്രാസന യുവജന സഖ്യ പ്രവർത്തനത്തിന്റെ ഉദ്ഘാടനം നിർവഹിച്ചതായും അദ്ദേഹം പ്രഖ്യാപിച്ചു.
ജീവിതത്തിന്റെ പൂർണത ക്രിസ്തുവിൽ എന്ന മുഖ്യവിഷയത്തെക്കുറിച്ച് റവ. പ്രമോദ് സഖറിയ മാത്യു (വികാർ എപ്പിപ്പിനി മാർത്തോമാ ചർച്ച്) മുഖ്യപ്രഭാഷണം നടത്തി. റവ.റജി ഐസക്ക് (അസിസ്റ്റന്റ് വികാരി സെന്റ് മാത്യൂസ് ചർച്ച് ടൊറന്റോ), റവ. ഏബ്രഹാം തോമസ് (ഡാളസ് മാര്ത്തോമ്മ അസിസ്റ്റന്റ് വികാരി), മുൻ ഭദ്രാസന യുവജനസഖ്യം ജനറൽ സെക്രട്ടറി ജിജി ടോം തുടങ്ങിയവർ ആശംസകൾ അറിയിച്ചു.
ഭദ്രാസന യുവജനസഖ്യം ട്രഷറർ അനീഷ് വർഗീസ് നന്ദി പറഞ്ഞു. തിരുമേനിയുടെ പ്രാർഥനയ്ക്കും ആശീർവാദത്തിനും ശേഷം യോഗ നടപടികൾ സമാപിച്ചു. ഭദ്രാസന യുവജനസഖ്യം ഭദ്രാസന അസംബ്ലി പ്രതിനിധി വിൻസിയായിരുന്നു മൊഡറേറ്റർ. റവ. സാം ടി. ഈശോ, യുവജനസഖ്യം വൈസ് പ്രസിഡന്റ് ജിനേഷ് തുടങ്ങിയവർ യോഗത്തിൽ പങ്കെടുത്തു.