ഡാളസ്: ഡാളസ് മലയാളികളുടെ അഭിമാനമായ കേരള അസോസിയേഷൻ ഓഫ് ഡാളസും ഇന്ത്യ കൾച്ചറൽ ആൻഡ് എജുക്കേഷൻ സെന്ററും സംയുക്തമായി സംഘടിപ്പിക്കുന്ന ഓണാഘോഷ പരിപാടി സെപ്റ്റംബർ രണ്ടിന് നടക്കും.
ഗാർലണ്ടിലുള്ള മാർ ഗ്രിഗോറിയോസ് മെമോറിയൽ ഓഡിറ്റോറിയത്തിൽ രാവിലെ പത്തര മുതൽ ഉച്ചയ്ക്ക് ഒന്ന് വരെയാണ് പരിപാടി. പൂക്കളമത്സരം, ചെണ്ടമേളം, കലാപരിപാടികൾ, മാവേലി ഘോഷയാത്ര, സദ്യ എന്നിവ ഉണ്ടായിരിക്കും. പരിപാടിയിലേക്ക് എല്ലാവരെയും ക്ഷണിക്കുന്നതായി സംഘാടകർ അറിയിച്ചു.
പ്രവേശനഫീസില്ലാതെ നടത്തപ്പെടുന്ന അസോസിയേഷൻ ഓണാഘോഷം ടെക്സസിലെ ഏറ്റവും വലിയ മലയാളി സംഗമവേദിയാണ്. പരിപാടിയുടെ സ്പോൺസറാവാൻ താത്പര്യമുള്ള വ്യക്തികളെയും സ്ഥാപനങ്ങളെയും സ്വാഗതം ചെയുന്നതായും അസോസിയേഷൻ അറിയിച്ചു.