ന്യൂയോർക്ക്: ബാബു ആന്‍റണിയും മകന്‍ ആര്‍തര്‍ ആന്‍റണിയും ഒന്നിക്കുന്ന സിനിമ ‘ദ് ഗ്രേറ്റ് എസ്കേപ്പ്’ മേയ് 26നു റിലീസ് ചെയ്യും. പൂർണ്ണമായും അമേരിക്കയിലാണ് സിനിമ ചിത്രീകരിച്ചിരിക്കുന്നത്.
ലോകപ്രശസ്ത ഗുസ്തി താരവും നടനുമായ ചാസ് ടെയ്‌ലറും പ്രധാന കഥാപാത്രമായി എത്തുന്നു. ജെ.എല്‍.സന്ദീപാണ് സംവിധാനം.
മിക്സഡ് മാർഷ്യൽ ആർട്സിൽ ബ്ലാക്ക് ബെൽറ്റ് നേടിയ ആര്‍തര്‍ ആന്‍റണി മുഴുനീള വേഷത്തിലെത്തുന്ന ആദ്യ ചിത്രമാണ് ‘ദ് ഗ്രേറ്റ് എസ്കേപ്പ്’. ബാബു ആന്‍റണിയുടെ ഭാര്യ ഇവ്ഗനിയ, ഇളയ മകൻ അലക്സ് ആന്‍റണിയും ചിത്രത്തിൽ വേഷമിടുന്നു.
സൗത്ത് ഇന്ത്യന്‍ യുഎസ് ഫിലിംസിന്‍റെ ബാനറില്‍ അമേരിക്കന്‍ മലയാളികളായ സുഹൃത്തുക്കള്‍ സംയുക്തമായാണ് ചിത്രം നിര്‍മ്മിക്കുന്നതെന്ന് ബാബു ആന്‍റണി അറിയിച്ചു. ഹോളിവുഡ്-തായ്‌ലൻഡ് താരങ്ങളും ചിത്രത്തിലുണ്ട്.
മികച്ച ആക്ഷന്‍ രംഗങ്ങളാണ് സിനിമയിൽ ഒരുക്കിയിരിക്കുന്നത്. അമേരിക്കയിലെ റിലീസിനൊപ്പം ഇന്ത്യയിൽ മലയാളത്തിലും തമിഴിലുമായും ചിത്രം പ്രേക്ഷകരിലേക്കെത്തും. പ്രേക്ഷകര്‍ക്ക് ഏറെ പുതുമയുണര്‍ത്തുന്ന ഒരു ദൃശ്യാനുഭവമായി ‘ദ് ഗ്രേറ്റ് എസ്കേപ്പ്’ മാറുമെന്ന് സംവിധായകൻ പറഞ്ഞു.
ചിത്രത്തിന്‍റെ പൂര്‍ണ്ണമായ എഫക്റ്റ് ആസ്വദിക്കാന്‍ തിയറ്ററില്‍ തന്നെ പ്രേക്ഷകര്‍ സിനിമ കാണാന്‍ ശ്രമിക്കണമെന്നും ബാബു ആന്‍റണി പറഞ്ഞു.
