അബൂദബി: കഴിഞ്ഞ മാസം ഇസ്രയേൽ കുടിയേറ്റക്കാർ അതിക്രമിച്ചുകയറി അഗ്​നിക്കിരയാക്കിയ ഫലസ്തീൻ നഗരത്തിന്‍റെ പുനർനിർമാണത്തിന് യു.എ.ഇയുടെ​ 30 ലക്ഷം ഡോളർ സഹായം. യു.എ.ഇ ​പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനാണ്​ സഹായധനം പ്രഖ്യാപിച്ചത്​. 

ഹുവാര ഗ്രാമത്തിൽ അതിക്രമത്തിനിരയാവർക്കും നാശനഷ്ടങ്ങൾ നേരിട്ടവർക്കുമാണ്​ സഹായം ലഭിക്കുകയെന്നും വാർത്താ എജൻസി റിപ്പോർട്ട്​ ചെയ്തു. ഫലസ്​തീൻ ജനതയെ സഹായിക്കുന്നതിനുള്ള യു.എ.ഇയുടെ ജീവകാരുണ്യ പ്രവർത്തനങ്ങളുടെ ഭാഗമായാണ്​ പദ്ധതി പ്രഖ്യാപിച്ചത്​.

ഇമാറാത്തി-ഫലസ്തീൻ ഫ്രണ്ട്ഷിപ്പ് ക്ലബ്ബിന്‍റെ സഹകരണത്തോടെ അബുദാബിയിലെ മുനിസിപ്പാലിറ്റി ആൻഡ് ട്രാൻസ്‌പോർട്ട് വകുപ്പാണ് ഈ സംരംഭം നടപ്പിലാക്കുക. ഫണ്ട് വിതരണത്തെ കുറിച്ച് ചർച്ച ചെയ്യാൻ ഹുവാര മേയർ മുയീൻ ദമൈദി ഉൾപ്പെട്ട ഫലസ്തീൻ പ്രതിനിധി സംഘവുമായി അധികൃതർ യോഗം ചേർന്നു​. 

പ്രതിനിധി സംഘം യു.എ.ഇ സന്ദർശനത്തിന്​ എത്തിച്ചേർന്നപ്പോഴാണ്​ കൂടിക്കാഴ്ച നടന്നത്​. ഫലസ്തീനും അവിടുത്തെ ജനങ്ങൾക്കുമുള്ള യു.എ.ഇയുടെ അചഞ്ചലമായ പിന്തുണയുടെ തെളിവാണ്​ സംഭാവനയെന്ന്​ യു.എ.ഇ പ്രസിഡൻറിന്‍റെ നയതന്ത്ര ഉപദേശഷ്ടാവ്​ ഡോ. അൻവർ ഗർഗാഷ്​ പറഞ്ഞു.