മയ്യിൽ: ചാർജിങ്ങിനിടെ ഇലക്ട്രിക്കൽ സ്‌കൂട്ടർ കത്തി നശിച്ചു. കണ്ണൂർ മയ്യിൽ പോലിസ് സ്റ്റേഷൻ പരിധിയിലെ കാട്ടാമ്പള്ളി കാഞ്ഞിരത്തറയിലെ എം സിദ്ദിഖിന്റെ സ്കൂട്ടറാണ് തിങ്കളാഴ്ച രാവിലെ ചാർജ്ജിങിനിടെ പൂർണമായും കത്തി നശിച്ചത്. സംഭവത്തിൽ കമ്പനി അധികൃതർ സ്ഥലത്തെത്തി അന്വേഷണമാരംഭിച്ചു.

തിങ്കളാഴ്ച രാവിലെ എട്ടു മണിയോടെയാണ് സ്കൂട്ടർ ചാർജിന് വെച്ചത്. 8.30 ഓടെ സ്കൂട്ടറിൽ തീ ആളിപ്പടരാൻ തുടങ്ങി. സ്കൂട്ടറിൽ നിന്നും തീ പടരുന്നത് ശ്രദ്ധയിൽപ്പെട്ടതോടെ വീട്ടുകാർ വീട്ടിൽ നിന്നും ഇറങ്ങി ഓടിയതിനാൽ ദുരന്തം ഒഴിവായി. വീടിനും ഭാഗികമായി നാശനഷ്ടങ്ങളുണ്ടായി.

റൂട്ട് ഓട്ടോ ഇലക്ട്രിക്കിന്റെ ഇ-ഫ്ലൈ എന്ന മോഡൽ സ്കൂട്ടറാണ് കത്തി നശിച്ചത്. സ്കൂട്ടറിന്റെ ബാറ്ററി ഒരു മാസമായി തകരാറിലായിരുന്നുവെന്നും ഇക്കാര്യം നിരന്തരം കമ്പനിയെ അറിയിച്ചിട്ടും ഒരു നടപടിയും ഉണ്ടായില്ലെന്നും എം സിദ്ദിഖിന്റെ മാതാവ് ബുഷറ പറഞ്ഞു.

സ്കൂട്ടർ കമ്പനിയുടെ അനാസ്ഥയ്ക്കെതിരെ പരാതി നൽകുമെന്നും സ്കൂട്ടറിനും വീടിനുണ്ടായ നാശനഷ്ടത്തിൻ്റെയും വില നഷ്ടപരിഹാരമായി ലഭിക്കണമെന്നും കുടുംബം പറഞ്ഞു. സംഭവത്തെ കുറിച്ച് കമ്പിനി അധികൃതർ സ്ഥലത്തെത്തി അന്വേഷണമാരംഭിച്ചു.