കാമുകനും മുന് കാമുകനും ഒന്നിച്ച് വീട്ടിലെത്തി മര്ദ്ദിച്ചതോടെ കിണറ്റില് ചാടിയ പെണ്കുട്ടിക്ക് പരിക്ക്. അടുത്തിടെ പെണ്കുട്ടി തന്റെ മുന് കാമുകനുമായി സംസാരിക്കുന്നത് നിര്ത്തിയിരുന്നു. ഇതില് ഇയാള് പ്രകോപിതനായിരുന്നു. ഇതിനിടെ പെണ്കുട്ടിയുടെ പുതിയ കാമുകനെ ഇയാള് കണ്ടുമുട്ടി. തുടര്ന്ന് ഇവര് തമ്മിലുള്ള വാക്കുതര്ക്കത്തിനൊടുവില് സത്യാവസ്ഥയറിയാന് പെണ്കുട്ടിയുടെ വീട്ടിലേക്ക് പോകാന് തീരുമാനിക്കുകയായിരുന്നു. ഇരുവരും വീട്ടിലെത്തി ബഹളം വെയ്ക്കുകയും പെണ്കുട്ടിയെ ചോദ്യം ചെയ്യുകയും ചെയ്തു. തര്ക്കത്തിനിടെ പെണ്കുട്ടിക്ക് മര്ദ്ദനമേറ്റതോടെ രക്ഷപ്പെടാനായി കിണറ്റിലേക്ക് ചാടുകയായിരുന്നു. മധ്യപ്രദേശിലെ ബേട്ടൂളിലാണ് സംഭവം.
പ്രായപൂര്ത്തിയാകാത്ത പെണ്കുട്ടിയുടെ വീട്ടിലേക്ക് കത്തികളും വടികളുമായി അഞ്ചംഗ സംഘമാണ് എത്തിയത്. ഇതിലുണ്ടായിരുന്ന രണ്ട് പേരാണ് കുട്ടിയെ മര്ദ്ദിച്ചത്. ഇതിനിടെ കുട്ടി കിണറ്റില് ചാടിയത് കണ്ട് നാട്ടുകാര് ഓടിയെത്തി രക്ഷിച്ചു. ഉടന് തന്നെ ബോര്ഡെഹിയിലെ കമ്മ്യൂണിറ്റി ഹെല്ത്ത് സെന്ററില് പ്രവേശിപ്പിച്ചു. എന്നാല് ആരോഗ്യനില വഷളായതോടെ ജില്ലാ ആശുപത്രിയിലേക്ക് റഫര് ചെയ്തു. പെണ്കുട്ടിയുടെ നില ഗുരുതരമാണെന്നാണ് സൂചന.
ഇതിനിടെ ആക്രമണം നടത്തിയ ഇരുവരെയും നാട്ടുകാര് പിടികൂടി പോലീസില് ഏല്പ്പിച്ചു. പെണ്കുട്ടിയുടെ പിതാവ് ഇരുവര്ക്കുമെതിരെ പരാതി നല്കിയിട്ടുണ്ട്. രണ്ട് പ്രതികളെ പോലീസ് അറസ്റ്റ് ചെയ്തിട്ടുണ്ട്. ഒളിവില് പോയ മറ്റ് പ്രതികള്ക്കായി തിരച്ചില് തുടരുകയാണ്.