മൂവാറ്റുപുഴ : വാഴപ്പിള്ളി ക്രൈസ്റ്റ് ദ കിംഗ് റോമന് കത്തോലിക്ക പള്ളിയില് മോഷണം. അള്ത്താരയില് വിശുദ്ധ കുര്ബാന സൂക്ഷിക്കുന്ന സക്രാരി കുത്തിത്തുറന്ന് കുര്ബാന സൂക്ഷിച്ചിരുന്ന കുസ്തോതിയെന്ന് അറിയപ്പെടുന്ന തിരുപ്പാത്രവും തിരുവോസ്തിയുമാണ് കവർന്നത്.
അരുളിയ്ക്കയില് സൂക്ഷിച്ചിരുന്ന തിരുവോസ്തിയും മോഷണം പോയി. കുസ്തോത്തില് ഉണ്ടായിരുന്ന തിരുവോസ്തി അള്ത്താരയില് വിതറിയ നിലയിലാണ്. ഇന്നലെ രാവിലെ ആറിന് കുര്ബാനയ്ക്ക് എത്തിയ പള്ളി ഭരണാധികാരികളാണ് മോഷണം ശ്രദ്ധയിൽപ്പെട്ടത്. പള്ളിയുടെ വലതുവശത്തുള്ള ജനല് തുറന്ന് പള്ളിക്കകത്ത് മോഷ്ടാവ് പ്രവേശിക്കുകയായിരുന്നുവെന്ന് കരുതുന്നു.
കൂടാതെ പള്ളിയുടെ ഭണ്ഡാരങ്ങളും തകര്ക്കാനുള്ള ശ്രമവും നടന്നിട്ടുണ്ട്. കുര്ബാനയ്ക്ക് ഉപയോഗിക്കുന്ന ഏറ്റവും വിലപിടിപ്പുള്ള വസ്തുവാണ് നഷ്ടപ്പെട്ടിട്ടുള്ളതെന്ന് വികാരി ഫാ. വിന്സെന്റ് പാറമേല് പറഞ്ഞു. രാത്രി 11 വരെ പള്ളിയില് ആളുകളുണ്ടായിരുന്നു. രണ്ടാഴ്ച മുന്പ് പള്ളിയില് നിന്ന് ഗിത്താര് മോഷണം പോയിരുന്നു. മൂവാറ്റുപുഴ പൊലീസ് അന്വേഷണമാരംഭിച്ചു.