അടിമാലി: യുവതിയുടെ ചിത്രം വാട്സ്ആപ്പിൽ പങ്കുവച്ചതുമായി ബന്ധപ്പെട്ടുണ്ടായ സംഘർഷത്തിൽ മൂന്ന് പേർ അറസ്റ്റിൽ. അടിമാലി സ്വദേശിയായ വിശ്വജിത്തിനെ മർദിച്ച കേസിൽ, ചാറ്റുപാറ സ്വദേശി അനുരാഗ്(34), രഞ്ജിത്(31), അരുൺ(28) എന്നിവരാണ് പിടിയിലായത്.
വിശ്വജിത്തിന്റെ സുഹൃത്തും അടിമാലി നഗരത്തിലെ സൂപ്പർമാർക്കറ്റിലെ ജീവനക്കാരനുമായ അഭിഷേക്, സഹപ്രവർത്തകയുടെ ഫോട്ടോ സാമൂഹ്യമാധ്യമങ്ങളിൽ പങ്കുവച്ചതാണ് പ്രശ്നങ്ങൾക്ക് തുടക്കമിട്ടത്. യുവതിയുടെ സുഹൃത്തായ അനുരാഗ്, അഭിഷേകിന്റെ നടപടിയെ ചോദ്യം ചെയ്ത് ഫോണിലൂടെ ഭീഷണി നടത്തിയിരുന്നു.
തുടർന്ന് പ്രശ്നം പറഞ്ഞ് തീർക്കാൻ അഭിഷേക് സുഹൃത്തായ വിശ്വജിത്തിനോട് ആവശ്യപ്പെടുകയായിരുന്നു. എന്നാൽ അനുരാഗുമായുള്ള ചർച്ചയ്ക്കിടെ തർക്കം രൂക്ഷമായി. ഇതിന്റെ പ്രതികാരമായിയാണ് ബുധനാഴ്ച വൈകിട്ട് നഗരമധ്യത്തിൽ വച്ച് അക്രമിസംഘം വിശ്വജിത്തിനെ മർദിച്ചത്.
സംഭവത്തിൽ കേസ് എടുത്തതായും പ്രതികളെ റിമാൻഡ് ചെയ്തതായും പോലീസ് അറിയിച്ചു.