ന്യൂഡൽഹി: ഡൽഹി മദ്യനയ കേസിൽ തെലുങ്കാന മുഖ്യമന്ത്രി കെ. ചന്ദ്രശേഖർ റാവുവിന്റെ മകളും എംഎൽസിയുമായ കൽവകുന്തല കവിതയെ സിബിഐ ചോദ്യം ചെയ്യുന്നു. സിബിഐ സംഘം ഹൈദരാബാദിലെ കവിതയുടെ വസതിയിലെത്തിയാണ് ചോദ്യം ചെയ്യുന്നത്.
ഞായറാഴ്ച രാവിലെ 11 ന് ബഞ്ചാര ഹിൽസിലെ കവിതയുടെ വസതിയിൽ വനിതാ ഉദ്യോഗസ്ഥയുൾപ്പെടെയുള്ള സിബിഐ സംഘം എത്തി. നേരത്തെ കവിതയ്ക്കു കേസുമായി ബന്ധപ്പെട്ട് ചോദ്യം ചെയ്യലിനു നോട്ടീസ് നൽകിയിരുന്നു. ഡൽഹിയിലെ സിബിഐ ആസ്ഥാനത്തോ ഹൈദരാബാദിലെ ഓഫീസിലോ ഹാജരാകാനായിരുന്നു നോട്ടീസിൽ ആവശ്യപ്പെട്ടിരുന്നത്.
എന്നാൽ ചോദ്യം ചെയ്യലിന് തന്റെ വസതിയിൽവച്ച് തയാറാണെന്ന് കവിത നോട്ടീസിന് മറുപടി നൽകി. ഇതനുസരിച്ചാണ് ഹൈദരാബാദിലെ കവിതയുടെ വീട്ടിൽ സിബിഐ സംഘമെത്തിയത്. വീടിന്റെ താഴത്തെ നിലയിലുള്ള ഓഫീസിൽ അഭിഭാഷകന്റെ സാന്നിധ്യത്തിലായിരുന്നു ചോദ്യം ചെയ്യൽ.