ഇന്ത്യയിലേക്ക് യാത്ര ചെയ്യുന്ന യുകെ പൗരന്മാര്‍ക്കുള്ള ഇലക്ട്രോണിക് വിസ(ഇ-വിസ) സൗകര്യം പുനരാരംഭിക്കുന്നു. ഈ സേവനം ഉടന്‍ ലഭ്യമാകുമെന്ന് യുകെയിലെ ഇന്ത്യന്‍ ഹൈക്കമ്മീഷണര്‍ വിക്രം ദൊരൈസ്വാമി പറഞ്ഞു. ഈ ആഴ്ച മുതല്‍ യാത്രക്കാര്‍ക്ക് ഇന്ത്യയിലേക്ക് ഇ-വിസയ്ക്ക് അപേക്ഷിക്കാന്‍ കഴിയുമെന്ന് ലണ്ടനിലെ ഹൈക്കമ്മീഷന്‍ ഉദ്യോഗസ്ഥര്‍ സ്ഥിരീകരിച്ചു. അടുത്ത മാസങ്ങളില്‍ ഇന്ത്യയിലേക്കുള്ള വിസകള്‍ക്കായി വന്‍ തിരക്ക് രൂപപ്പെടാനിരിക്കെയുള്ള ഈ നീക്കം വ്യാപകമായി സ്വാഗതം ചെയ്യപ്പെട്ടുകഴിഞ്ഞു.
സിസ്റ്റം അപ്ഗ്രേഡ് പ്രക്രിയ നടക്കുന്നുണ്ടെന്നും ഇ-വിസയ്ക്കുള്ള അപേക്ഷകള്‍ സ്വീകരിക്കാന്‍ ഇന്ത്യന്‍ വിസ വെബ്സൈറ്റ് ഉടന്‍ തയ്യാറാകുമെന്നും അറിയിപ്പുണ്ട്. ഇ വിസ പുനസ്ഥാപിക്കുന്നത് യുകെയില്‍ നിന്നുള്ള സുഹൃത്തുക്കളെ ഇന്ത്യയിലേക്ക് കൂടുതല്‍ എളുപ്പത്തില്‍ യാത്ര ചെയ്യാന്‍ പ്രാപ്തരാക്കുമെന്ന് ഹൈക്കമ്മീഷണര്‍ വിക്രം ദൊരൈസ്വാമി പറഞ്ഞു. ട്വിറ്ററില്‍ പങ്കുവെച്ച വീഡിയോയിലൂടെ നടത്തിയ പ്രഖ്യാപനത്തിന് വലിയ പ്രതികരണമാണ് ലഭിച്ചത്.
കഴിഞ്ഞ മാസം ഇന്തോനേഷ്യയില്‍ നടന്ന ജി 20 ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും യുകെ പ്രധാനമന്ത്രി ഋഷി സുനക്കും തമ്മില്‍ ചര്‍ച്ച നടത്തിയിരുന്നു. ചര്‍ച്ചയില്‍ ഇ-വിസ വിഷയവും പരാമര്‍ശിച്ചതായി റിപ്പോര്‍ട്ടുകളുണ്ടായിരുന്നു.
